ҒОР

Доwӯд маҷбӯр вуд иде̂, фук wахт баша̄нд ҷой хурд х̇икӣрт. Йу тар ар ҷо ца сут, wийен фукаϑ фа̄мт, ба̄ден дар борайи ди фукаҷо лу̊д. Амо Доwӯди мис оста-оста̄ фана̄ аскарен хурд ҷа̄м чӯд.

Wа̄δен пи кӯен тар ғор дарӯн ху ҷой чӯд. Йи рӯзен wа̄δ wам ғор пиронди нӣсцин вадат, чӯх̇тен аз δараϑ ғула̄ лих̇кар от сут.

Доwӯди ба̄д лу̊д: «Йид Шоул ху лих̇кар қати, да̄δен му х̇икӣдоw йат, гуйо зӣнен му. Ҷой ху кинет!»

Доwӯд аскаренен тезаϑ тар ғор дед. Wам ғор пиройанд пайра̄ ца вуд, йу мис ба̄д аз йичанд дақӣқа̄ дедху лу̊ди: «Подх̇о хубаϑ тару̊да̄ҷ йат. Довуд, турд хуб wахт! Ту ва̄рδийи има шич wи зӣдоw! Йу тоқа̄ϑ, йута йичӣзаϑ турд нава̄рδед. Wийат ди зӣд wа̄δ ара азор аскарта тунд сен».

Доwӯди wи га̄п х̇ичух̇тху, лу̊ди: «Оста̄!» Фукаϑен ба̄д қарор чӯд. Wа̄δен wи торикинди тар wам ғор ғе̂в чӯх̇т, ат йакбораϑ Шоул ху подх̇ойи луқен қати от сут.

Доwӯди оста̄йикаϑ лу̊д: «Тама ма̄йадет», ба̄д хубаϑ оста-оста̄ тӯйд.

Шоул ба̄д аз та̄х зибо сутху ачга от навуд. Доwӯд мис х̇уп-х̇упик тар wам та̄х хез сутху, чӯх̇ти Шоуланд wи курта̄ нӯлак дӯсикаϑ от вуд. Доwӯди ху шамшер қати wи курта̄ нӯлак х̇ичух̇тху оста̄йикаϑ во тар ху ҷой сут.

Доwӯд гах̇т чӯдху wи аскаренен wи пех̇цт: «Тут чӣзард Шоул назӣд?»

Доwӯди wевард дисга ҷаwоб δод: «Wийи Хуδой подх̇о та̄ӣн чӯд. Ик wи одами Хуδой интихоб ца чӯҷ, wузта wи назӣнум». Wа̄δ на̄ла: «Хе̂р Хуδойи аз wи пигоϑ ху пӣц гарδентат, туйи интихоб чӯд!»

Доwӯди ба̄д лу̊д: «У̊н, рост, амо Хуδойта хубаϑ фа̄мт иде̂, цаwахт бойад wуз тахтти ниϑум. Wуз бойад ди кор хубаϑ тар пиро ма̄кум».

Фукаϑен тар wам ғор ғе̂в чух̇т. Подх̇о аз ғоранд нах̇тӯйд.

Доwӯди ху аскаренард лу̊д: «Тама ғал тару̊д ниϑет».

Ба̄д хубаϑ подх̇о да̄мти нах̇ту̊йдху, чӯх̇ти Шоул ар тагов ху аскарен қати вуд.

Доwӯди ба̄д ар зима̄δец ху ха̄м δод. Йид них̇у̊найи ик wи вуд иде̂, гуйо йу аз Шоул амчун подх̇о урмат ких̇т. Йуйи Шоулард лу̊д: «Е му подх̇ойат, му хӯҷайӣн! Ту чӣзард фикр кини иде, гуйо wузум турд бади чичӣд? Wузум ик шич ва̄рδод ту зӣдоw, амо назӣдум ту».

Доwӯди ба̄д ик wи курта̄ канди иде̂, ху шамшер қатийи wи ца х̇ичух̇т, сенти пу ху ка̄лху Шоуларди дивих̇т. Йуйи х̇оҷ пи х̇оҷ тар ху курта̄ чӯх̇ту, wӣнти иде̂, йу ақу̊нийаϑ х̇ичух̇чин. Шоул ба̄д дараw нӣwд сутху лу̊ди: «Тут аз му росткорди вуδҷ! Тут ик ди ху кор қати мурд дивих̇т иде̂, ту мурд неки хойих̇ кини, ат wузум турд бади хойих̇ чӯд. Wуз фа̄мум иде̂, тута ақу̊нийаϑ подх̇о са̄wи. Wа̄да̄ мурд δа иде̂, тута му а̄л-аwлод нест накини!»

Доwӯди ба̄д ик ди wирд wа̄да̄ δод. Шоул аз Доwӯд корат кирдор айру̊наϑ редху, ху аскарени қӣwдху, wеварди лу̊д иде̂, ачгата Доwӯд пех̇ ната̄жа̄м. Wа̄δен фукаϑ ху ворҷен пӣц гарδентху, тар ху ҷойен гах̇т чӯд, ат Доwӯди дарозец аз зибо wев чӯх̇т.