ДОWӮДАТ ШОУЛ

Ба̄д аз ди ғалаба̄ Доwӯд подх̇о дарборанд ред. Шоули wи қати аwқот хӯдат, чақ-чақи wи қати чӯдат, йакборийи мусла̄т аз wи пех̇цт. Доwӯд оста-оста̄ шамшерат неза̄ қати δе̂дчӣд мис ухма̄нд сутху, зӯр аскар сут. Доwӯди ар чӣз ца чӯдат, ца лу̊ди, Шоулат wи дарбор одаменард фукаϑ хуш йатху, охиру̊нарден подх̇о лих̇каранд қуманду̊н wи не̂δд.

Амо Доwӯданд ди wахтанд сар лап муносибат Шоул пуц, Йунотон қати вуд. Йу wи сар наздӣк ох̇но вуд. Ба̄д аз wи иде̂, Доwӯди аз Ҷолйот ца δод, Йунотони wирд лу̊д: «Му δе̂д луқенат, му шамшерат, му камцаму̊н зи. Ла̄к да̄δ ма̄ш ох̇нодори них̇у̊на̄ вийен».

Аз дам рӯзанден Доwӯдат Йунотон сар наздӣкат, сар wафодорат, сар хах̇ ох̇нойен сат. Wа̄δен варϑ ик ди ху ох̇нодори лап қадр чӯд.

Мардуми мис Доwӯд жӣwҷ чӯд. Чорикенат, ɣиникенат, кӯдакенард аз подх̇о Шоул Доwӯд хушди вуд. Амо Шоуланд ди ҷа̄т wи қа̄р сифӣд, wирд йид хуш навуд. Йи рӯзен Шоулат Доwӯд дасторху̊нти нӣсцин вадат, подх̇о қа̄р во сифӣд. Доwӯди тезаϑ ху барбат зох̇тху, гуйо wам ниwе̂здоw қати Шоул ору̊м ких̇т. Амо мам пӣδи wи ниwе̂здоw йордам начӯд. Ду̊н ҷа̄т мам пӣδ Шоул қа̄р Доwӯд қати сифӣд. Йуйи Доwӯд барбат қати ху пиронди wӣнтху, ачгайи ху гӣрчӣд нава̄рδод.

Пи бурҷанд неза̄ пидре̂зҷин вуд. Подх̇ойи wи зох̇тху, ху шастанди Доwӯдти wи wеδд. Амо йуйи тезаϑ ху х̇уп δодху, йу неза̄ wи тар ка̄л наɣҷӣдху, бурҷанд х̇аф сут. Ба̄д аз ди Шоул қа̄р соф хах̇ди сифӣд. Йуйи во йига неза̄ зох̇тху Доwӯдтийи wеδд. Ага Доwӯди тезаϑ ху тар па̄ли ца начӯҷат, йу неза̄ wи сӣна̄йанд δоδҷат.

Подх̇ойи хах̇аϑ wа̄ғаст δод: «Wуз ачга Доwӯд wӣнтоw хойих̇ накинум. Ла̄к йам йи ҷо δарди су̊дху, фалиштийен қати δед ких̇т».

Шоули х̇оҷ δӯйд, ду̊н ҷа̄т йуйи фа̄мт иде, Хуδой Доwӯд тарафанд. Ба̄ди римод Доwӯд аз wи хезанд δарен.

Йу̊данд лу̊вдоw даркор иде̂, Шоули пиро аз Доwӯдат Ҷолйот δе̂д йи wа̄да̄ ца δод, wийи иҷро чӯд: wи ризӣн Мекал Доwӯд ɣин сат.

Амо Доwӯд маҷбӯр вуд иде̂, азеданд рицӣϑт, ду̊н ҷа̄т Йунотони wирд лу̊д иде̂, Шоул фақат тар δе̂д ту чийе̂д нистат, йу хойих̇ ких̇т зӣнт ту.