АЗ УРДӮН НАƔҶӢДОW
Китоби Муқадас, «Нӯн пуц Йоуша̄ » китоб, 3, 4 бобен
Нӯн пуц Йоуша̄ са̄ракаϑ Исроӣл мардум қати тар Урдӯн дарйо хез сут. Wа̄δен дарйола̄вти ху хиргойен барҷой чӯдху аз wи тараф наɣҷӣдоwарден тайори дараw чӣд сат. Йоуша̄йи мардумард лу̊д иде̂, wа̄δ бойад сар пиро пок ху кинен, ду̊н ҷа̄т Худоwанд хойих̇ ких̇т иде̂, мӯҷиза̄ них̇у̊н δӣд.
Wам йига рӯзи Худоwанд Йоуша̄йард лу̊д: «Wузта нур мардумард дивесум иде̂, цара̄нгта турд йордам кинум, арра̄нгум йи wахт Мӯсойард йордам ца чӯд. Ту рӯу̊ни робаренард лу иде̂, наwен ар Урдӯн дарйо ди дед, wам а̄д сандӯқ қати гӣр сен!»
Ба̄ди Йоуша̄ аз рӯу̊ни робарен римод иде̂, wам сандӯқ зенху мардум тар пиро wам қати тийен. Ат wи мардумарди лу̊д: «Тамата нур Худоwанд мӯҷизайен wинетху, фа̄мета иде̂, ақу̊ни Хуδой тама қати. А̄д сандӯқта тама тар пиро Урдӯнард аз wи тараф наɣҷӣст. Аз ар қабӣла̄ йӣwи одам ху қати зет. Wевардта алойид кор сипорум!... Наwта рӯу̊ни робарен wам сандӯқи Худоwанд қати ар Урдӯн х̇ац деδенат, йа̄ х̇ацта δу қисм су̊д: аз йи тарафта йа̄ ҷа̄м су̊дху гӣрта су̊дат, ат аз wи йига тарафта йа̄ тӣзд».
Рӯу̊ни робаренен наw wам сандӯқ қати ар х̇ац дедат, йа̄ х̇ац аз тӣр ца йат, йакбораϑ гӣр сат. Йа̄ х̇ац аз wев рӯу̊ни робарен пи тӣрди йи ҷонди ҷа̄м сатху гӣр сат, тулу деwол аз wам о вуди. Аз тагов йа̄ х̇ац ик дити тойд, ту̊нец қоқ насат. Йамва фирохаϑ пу̊нд сутху, wа̄δ рӯу̊ни робаренен wам сандӯқ қати то мобайни дарйоец сатху, йаманден гӣр сат. Ба̄ден фукаϑ исроӣлийен қоқива тойдху, wам сандӯқ па̄ливайен наɣҷӣдху, Урдӯнарден аз wи тараф фирӣпт.
Худоwанди римод иде̂, аз ар қабӣла̄ йӣwи одам, йа̄ни дуwозда̄ чорик аз дарйо бунанд, каманден рӯу̊ни робарен сандӯқ қати wирӣвʒин ца вад, йӣwи жӣр зенху, ик тар wи ҷой йосен иде̂, х̇а̄бта мардум йаманд ца х̇е̂фцт. Ба̄ди Йоуша̄ дуwозда̄ жӣрга зох̇тху, ар Урдӯн буни ик wи ҷойанди wев рибӯд иде̂, йаманден рӯу̊ни робарен сандӯқ қати wирӣвʒин ца вад.
Фукаϑ мардум Урдӯнард аз wи рӯй наɣҷӣдху wа̄δ рӯу̊ни робаренен мис сандӯқи Худоwанд қати wев да̄мти йат. Wа̄δен наw аз Урдӯнанд нах̇тойдат, йа̄ х̇ац во дараw тӣд сатху, пироки дастӯр пи зӣмба̄йец фирӣпт. Йу мардуми ди Худоwанд мӯҷиза̄ wӣнтху айру̊наϑ ред. Wа̄δен ба̄д азаманд тар Ҷилҷол ну̊м ҷой сат иде̂, йу Ериӯйард аз шарқ тараф вуд. Wев дуwозда̄ жӣр иде̂, дуwозда̄ чорикен wев аз Урдӯнанд ца зох̇т, Йоуша̄йи wев йаманд рибӯдху wи мардумарди лу̊д:
«Ар wахта тама пацен тама ца пех̇цен иде̂, ик мев жӣрен ма̄нӣ чӣз? Тама wевард лу̊вет: «Йу̊данд Урдӯн х̇ац Худоwанд сандӯқ хезанд δу тақсӣм сат. Да̄δ жӣрента Исроӣлард йодгори ҷиноw абади рисен, ла̄к фукаϑ халқен мам ҷау̊нти фа̄мен иде̂, Худоwанд δустенен лап бақуwат! Ат ла̄к тама мис то ху мӣдоwец аз ху Худоwанд δоҷ δе̂рет!
САWОЛЕН
1) Сандӯқи а̄д қати халқ тар пиро бойад ча̄й суδҷат? 2) Бар Урдӯн х̇ац чӣз сут? 3) Урдӯн х̇ацла̄вти чиду м айкал не̂δҷин вуд? Ԝинд чӣз ма̄ни вуд?