РООБАТ ҶОСӮСЕН
Китоби Муқадас, «Нӯн пуц Йоуша̄» китоб 1,2 бобен
Ба̄ди Мӯсо мӣдоw Нӯн пуц Йоуша̄йи Исроӣл мардум қати тайори дараw чӣд сут, wа̄δен wа̄даδоδҷин замӣн чи анҷӣвд вад . Худоwанди Йоуша̄йард wа̄да̄ δод: «Ага тута Му қонунен иҷро кинийат, Му га̄пента ца ниғу̊ɣи, Wузта турд йордам кинум.
Фук wахт хах̇ ху ки, аз йичӣзаϑ х̇оҷ ма̄δе̂р, ар ҷота ца са̄wи Худоwанд фукаҷо ту қати!» Та̄ми Йоуша̄ мардум римод иде̂, ара рӯзард харч хурд тайора̄ кинен, ду̊н ҷа̄т wа̄δен Урдӯн дарйойард аз wи тараф чи наɣҷӣд вад. Wи замӣни wевард Хуδой wа̄да̄ δод, ди ҷа̄т ба̄д wи ну̊м wа̄даδоδҷин замӣн вуд.
Йоуша̄йи баатйот кор чӯд. Йуйи аwал δу ҷосӯс бох̇т. Wа̄δен бойад фукаϑ wи замӣнат Ериӯ х̇а̄рга чӯх̇чат. Wа̄δен тар wи х̇а̄р дедху х̇а̄бен тар Рооб ну̊м ɣиник чӣд ред. Рооб чӣд х̇а̄р бурҷ хезанд вуд.
Ериӯ подх̇ойи дар борайи ди фа̄мтху, ху одамен римод иде̂, wев исроӣлийен анҷен.
Амо Рооби wев пи ху дишӣд ҷой чӯдху wев подх̇о одаменарди лу̊д: «У̊н, тар му хезен бегу̊на̄ одамен вад, амо wуз wев нафа̄мум. Х̇у̊м сутху wа̄δен тойд. Wев да̄мти ца сет дарйовта wев кинет».
Wа̄δ подх̇о одаменен тойд wев исройӣлийен х̇икӣдоwат, Рооб сифӣд пи дишӣдху, wев ху мему̊ненарди лу̊д:
«Wуз фа̄мум иде̂, Худоwанди ик ми замӣн тамард да̄кчӯд. Ериӯ мардум фукаϑ аз тама х̇оҷ δе̂рт. Ма̄ша̄м Худоwанд мӯҷизайен х̇уд, цара̄нги аз Мисрийанд тама зиwостху, ба̄ри Сурх мобайнвайи қоқ чӯдху, пу̊нди тамард чӯд. Ма̄ша̄м х̇оҷ δӯйд, ду̊н ҷа̄т тама Худоwанд ақу̊ни Хуδой иде̂, замӣнат осму̊н wи миδуст ца. Ида wузум диду̊нд баша̄нди тамард чӯд, ат тама шич wа̄да̄ мурд δет иде̂, муйат му ху̊наwода̄та аз ма̄рг халосет. Йичӣз мурд лу̊вет иде̂, ла̄к wуз фа̄мум тамата му га̄п иҷро кинет».
Wа̄δ ҷосӯсенен Рообард wа̄да̄ δод иде̂, wамат wам ху̊наwода̄та наҷот δен. Йа̄йи ба̄д wевард йордам чӯдху wа̄δен ва̄х̇ қати тоқва ха̄вд. Wа̄δен тӣдоwти Рообард лу̊д иде̂, ху тоқти рӯшт ва̄х̇ вӣст. Йидта wев них̇у̊на̄ су̊дху, аз рӯйи ди них̇у̊на̄та йа̄йат wам чӣд-ҷама̄т аз ма̄рг халос сен.
Wа̄δ ҷосӯсенен ба̄д аз ди х̇а̄ранд нах̇тойдху тойден.
Wа̄δен ба хӯбийаϑ тар Йоуша̄ хез фирӣптху ар чӣзен ца wӣнтат ца х̇уден, wирден нақл чӯд. Охиру̊нен ба̄д лу̊д: «Худоwанди wи замӣн фукаϑ ма̄шард да̄кчӯд. Йу wев мардум фукаϑ аз х̇оҷи ма̄ш лаɣʒа̄ ких̇т».
САWОЛЕН
1) Худоwанди Йоуша̄йард чӣз wа̄да̄ δод?
2) Йоуша̄ тар Канон замӣн чи дед ца вуд, сар пиройи чӣр чӯд?
3) Wа̄δ ҷосусенен цара̄нг халос сат?