ЕРИӮ АНҶӢВДОW

Ериӯ мардуми аз х̇оҷиред исроӣлийен ху х̇а̄р дарвозай дарвозайен чуст чӯд. Йича̄йаϑ аз х̇а̄р на нах̇тӯйдат, тарам мис надед.

Худоwанди ба̄д Нӯн пуц Йоуша̄йард лу̊д: «Wузта Ериӯйат, wи подх̇ойат, wи лих̇кар турд таслӣм кинум. Ла̄к ту аскарен хоɣ рӯз wи х̇а̄рард ноɣен. Ла̄к wӯвд рӯу̊ни робар Худоwанд а̄д сандӯқ тар пиро wӯвд тирум қати тийен. Ат wӯвдум рӯзти wи х̇а̄р гаргинӯх̇а̄ wӯвд пӣδ ноɣетху, ла̄к рӯу̊ни робарен тирум δен. Ик ди ду̊нд wахтанд тама бойад ачаϑ га̄п ма̄δет, ат ар wахтат ту ди лу̊д, ла̄к мардум хах̇аϑ ҷе̂ғ δӣдху ба̄дта wи х̇а̄р бурҷен то булодец нихарϑен. Ба̄д аз ди ла̄к ту аскарен арча̄й ху тарафва ар wи х̇а̄р деδен».

Нӯн пуц Йоуша̄йи фукаϑ Хуδой га̄пен аскаренат рӯу̊ни робаренард лу̊д. Ба ғайри дийи wевард лу̊д иде̂, арцу̊нд тилойат, нуқра̄йат, ар чӣзга аз мисат сипинанд ца, йу фукаϑ моли Худоwанд. Йоуша̄йи мардум ғу̊ɣ хабар чӯд иде̂, аз Ериӯйанд хурд йичӣзаϑ ма̄зен, ат арча̄йта ца зе̂зд, wита зӣнен.

Ар чӣзи Худоwанд ца лу̊д, исроӣлийенен Wи га̄пти чӯд.

Ба̄ди Исроӣл лих̇кар уҷум чӯд. Сар пиройен wӯвд рӯу̊ни робар тирумен қати вад, wев да̄мтийен рӯу̊ни робарен а̄д сандӯқ қати тойд, ат аз wев зибойен исроӣлийен тойдат тирумен δод.

Йоуша̄йи фукаϑард лу̊д иде̂, ту̊нецум wуз наримоδҷ йича̄йаϑ ҷе̂ғ ма̄δӣд.

Йид мардуми хоɣ рӯзанд йак бор wи х̇а̄р гаргинӯх̇а̄ қарораϑ гирд δод. Афтум рӯз са̄ракийиен мис Ериӯ гаргинӯх̇а̄ қарораϑ не̂ɣдат фақат рӯу̊ни робаренен ду̊нд тирум δод. Ба̄ди мардум wӯвдум пӣδ wи х̇а̄р гаргинӯх̇а̄ не̂ɣдат, рӯу̊ни робаренен тирум δодат, Йоуша̄йи хах̇аϑ қӣwд: «Ҷе̂ғ δет!»

Ба̄ден фукаϑ аскарен хах̇аϑ ҷе̂ғ δод. Ди wахтанд х̇а̄р бурҷенен дараw лаɣʒа̄ сатху азамтийен ғула̄ жӣрен дараw wе̂х̇т сат. Ба̄д аз йичанд дақӣқа̄ йи ку ра̄нг хах̇ деwол фукаϑ wе̂х̇т, ат ик wи ҷойанд Рооб чӣд ца вуд, йаманд йу бурҷ нанихух̇т.

Исроӣл аскаренен wитийаϑ тар х̇а̄р дедху тезаϑен wи анҷӯвд.

Нӯн пуц Йоуша̄йи wев ҷосӯсенард лу̊д: «Рообардет wа̄да̄ ца δод, шич сетху wамат wам ҷама̄тен аз чӣданд зиwе̂δет».

Wа̄δен Рообат wам а̄ли ойила̄ вирӯдху, wевен мис тар Ҷилҷол, тар исроӣлийен хез йод. Ат Ериӯ фукаϑ нест сут.