МИСИН ДИВӮСК

Исроӣл халқи бийа̄бу̊нард лап гирд δод. Wа̄δен йакбори тар Канон замӣн хез соф наздӣк сат, амо йу абри во тар йига тараф тӯйдху, wа̄δен во маҷбур сат тар бийа̄бу̊н гах̇т кинен. Аз рӯйи дийен wа̄δ хах̇ малол сат, ду̊н ҷа̄т wеванд wев орзӯ – тар wа̄даδоδҷин замӣн дедоw вуд дедоw вуд.

Шичарден йаӯдийен бийа̄бу̊нанд нола̄н ца начӯҷат, Худоwанди пигоϑ wев тар Канон вӯҷат, амо Йуйи wев тарам ца нала̄кчӯд, йид амчун ҷазо wевард вуд. Йи рӯзен во wа̄δ бар зидди Хуδойат Мӯсо андойдху лу̊ден: «Тамет чӣзард аз Мисрийанд ма̄ш зиwост? Тару̊д на гарδа̄, на х̇ац, йам ма̄нна ачга ма̄шард нафорт».

Хуδойи ба̄д дев га̄пен ҷа̄т хах̇ ҷазо wев δод: йаманден за̄рдор дивӯскен пеδо сатху, wи мардумен дараw жирих̇т сат. Аз wев за̄р фана̄ мардум мӯд.

Исроӣл мардуми тӯба̄ чӯдху Мӯсойарден лу̊д: «Ма̄ша̄м бар зидди Худоwандат бар зидди ту га̄п δодху гунойа̄м чӯд. Ту дуо ки, ла̄к Хуδой аз мев дивӯскен ма̄ш халос ких̇т». Мӯсойи ба̄д халқ ҷа̄т дуо чӯд. Хуδойи wи дуо х̇удху лу̊ди wирд: «Мис зиху аз wинди дивӯск сохта̄ ки. Ба̄д зи wиху моϑти wи хах̇ ки. Мардумард лу иде̂, ар чийи дивӯск ца жирух̇ч, тар дам мисин дивӯск чисен, wа̄δта ба̄д зинда̄ рисен».

Ик wа̄δ одамен иде̂, дивӯски wев ца жирух̇т, аз δарандийен мис тар wам мисин дивӯск ца чӯх̇т, wев да̄рδ бедху wев қуwат во тар wев йат.

Ик wа̄δ исроӣлийен иде̂, Хуδойарден боwар чӯдху тар wам мисин дивӯскен ца чӯх̇т, хубен сатху, аз ху ҷойтийен андойдху, Хуδойарден шукрат чӯд. Амо афсӯс, фукаϑен боwар начӯд иде̂, тар wам мисин дивӯскта чисенху хубта сен.

Wа̄δен боwар начӯдху начӯх̇тен, ди ҷа̄тен ба̄д мод. Wеварди Хуδой wев зиндаги бахих̇ чӯд, ат мисин дивӯскта ди нава̄рδед! Аз одамен фақат боwари δе̂доwат Wи га̄п ниғих̇тов вуд.

САWОЛЕН

1) Исроӣлийенен тар бийа̄бу̊н дароз редху чӣрен чӯд?

2) Хуδойи wев ҷазо δе̂доw ҷа̄т чӣр чӯд?

3) Хуδойи аз Мӯсо чӣз римод иде̂, ла̄к ик wев одамени дивӯск ца жирух̇т, wа̄δ хуб сен