Х̇ац аз кӯ дарӯнанд
Китоби Муқадас, «Ададен» китоб 20:1-13, 22-29 бобен
Исроӣлийенен цу̊ндо солен аз йи ҷо тар йига ҷо наɣҷа̄дат, бийа̄бу̊нарден саргарδу̊н вад. Йакборен тар дисга ҷой йат иде̂, йаманд х̇ац навуд. Wа̄δен ба̄д чӣр чӯд? Ху пӣцен пи Хуδой чӯдху, дуойен чӯдо, йо шикойатен во дараw чӣд сат? Афсӯс, wа̄δен во wи ху пироки кор чӯд, йа̄ни йичӣз қӣни ас пиро ца йат, wа̄δен бар зидди Мӯсойат Орӯн андойд. Wа̄δен лу̊д: «Ма̄ша̄м чӣзард пиройаϑ намод? Тамет чӣзард аз Мисрийанд ма̄ш зиwост? Гуйо ла̄к бийа̄бу̊нанд мара̄мо? Тару̊д на анҷӣрат, на ангӯрат, на йичӣзга меwа̄, тару̊д х̇ацаϑ мис нист!»
Wа̄δен ик ди ринӯх̇т иде̂, Хуδойарден боwар начӯдху, аз рӯйи дийен ғалаϑ мис бийа̄бу̊нард саргарδу̊н вад.
Мӯсойат Орӯнен wев шикойат х̇удху малолен сат. Wа̄δен аз мардум хезанд δарди сатху, ибодатху̊на̄ пирондийен ху чизу̊н δодху, дуойен дараw чӣд сат. Ба̄ди Хуδой wев қати га̄п δод. Йуйи Мӯсойард лу̊д: «Ху моϑ зиху ди мардум ҷа̄м ки. Ба̄д са тар wи кӯ хезху, лу wирд иде̂, х̇ац да̄ких̇т. Аз кӯ дарӯнандта ба̄д х̇ац нах̇тӣзд».
Амо Мӯсойат Орӯнанд wев қа̄р мардум қати лап сифӣд.
Wа̄δен ба̄д мардумард лу̊д: «Е сахрайен ниғу̊ɣет, аз ми кӯ дарӯнанд х̇ац тамард зиwе̂δа̄мо?»
Ба̄ди Мӯсо ху моϑ сентху δу пӣδи wи қати кӯйард δод. Азаманд лапаϑ х̇ац нах̇тойдху, мардуми а̄м хубаϑ бирох̇тат а̄мен ху айwу̊нард δод.
Мӯсойат Орӯнен рост кор чӯдо? Мӯсойи йичанд хатогийен чӯд. Йуйи бойад ху моϑ қати wи кӯйанд ма̄δоδҷа̄т, йуйи бойад wи кӯ хезанд га̄п ду̊нд δоδҷат. Ба ғайри ди, Мӯсойат Орӯнен хубаϑ мис боwар начӯд иде̂, аз кӯйандта х̇ац нах̇тӣзд.
Амо Худоwанди ху халқард ме̂рабу̊ни чӯдху х̇аци wевард да̄кчӯд. Ат Мӯсойат Орӯнарди Йу лу̊д: «Тамет дисга кор ца чӯд, ди ҷа̄тта тар Канон замӣн надеδет».
Йид wевард хах̇ ҷазо вуд. Мӯсойи фук wах̇т орзӯ чӯд иде̂, Канон замӣн wӣнт, ду̊н ҷа̄т йаманди Иброӣм қурбу̊ниҷой мӣздху Хуδойарди саҷда̄ чӯд. Амо ба̄д аз ди wоқийа̄ wи орзӯ иҷронасут.
Мӯсо лап хоксор одам вуд. Исроӣлийенен фана̄ wахтен аз wи норозӣ вадат, дойимаϑен ношукри аз wи чӯд, амо йуйи йакбор мис хах̇ га̄п пи wев наδод. Амо мам пӣδи йу ху гӣрчӣд нава̄рδод.
САWОЛЕН
1) Мардуманд х̇ац ца навуд, wа̄δен чӣр чӯд?
2) Хуδойи дар борайи аз кӯйанд х̇ац зиwе̂стоw Мӯсойард чӣз лу̊д?
3) Мӯсойи ба ҷойи ди чӣр чӯд?
4) Хуδойи Мӯсойат Орӯн цара̄нг ҷазо δод?