Павел уонна Сила

Савл урукку өттүгэр христианнары сөбүлээбэтэ, сойуолуура, оттон билигин Үтүө сурах тарҕанарын туһугар олус элбэҕи үлэлиирэ. Уларыйбытын бигэргэтэр курдук билигин Савлы үксүн Павел диэн ааттыыр буолбуттара. Кинилэр хас да буолан оннооҕор Европаҕа тиийэ айанныыллара. Ханна да кэллэр, бастатан туран Павел иудейдары көрдүүрэ. Кинилэр синагогалара суох буолан, субуота ахсын аһаҕас халлаан анныгар мусталлара. Биир маннык түмсүү кэнниттэн Павелга мааны таҥастаах дьахтар чугаһаабыта. Аата Лидия диэн этэ. Кини Иисус туһунан элбэҕи билиэн баҕарара.

Өр сэһэргэспиттэрэ. Тиһэҕэр Лидия:

— Таҥара миигин Бэйэтин оҕотун курдук ылынарын туһугар миигин кытта үҥэн көрдөс эрэ. Ол кэннэ мин сүрэхтэниэхпин баҕарабын, — диэн көрдөспүтэ.

Сүрэхтэнии кэнниттэн Лидия Павелы доҕотторун кытта дьиэтигэр олордо ыҥырбыта. Ол гынан баран Павел уонна аргыһа Сила киниэхэ өр буолбатахтара. Аҕыйах хонугунан куорат судьуйата кинилэри хаайыыга уктарбыта. Куорат сорох олохтоохторо иудейдар манна кэлэн гректэргэ уонна римляннарга Таҥара тылын кэпсииллэрин сөбүлээбэтэхтэрэ. Павеллаах Силаны хаайыыга атахтарыттан, илиилэриттэн муостаҕа хам туттарар анал адаҕалаах сиргэ бырахпыттара. Кинилэр хамсыыр да кыахтара суоҕа, турар туһунан этэ да барыллыбат.

Ол үрдүнэн Таҥара тылын тарҕатааччылар Айыы Тойон хаайыыга даҕаны кинилэри кытта баарын билэллэрэ. Онон санаалара бөҕөх этэ.

Биирдэ Павеллаах Сила Айыы Тойону айхаллаан ырыа ыллыы сыппыттара. Бастаан оргууй ыллаабыттара, онтон улам куоластара улаатан, дуорааннанан чугастааҕы хосторго эмиэ иһиллэр буолбута. Хаайыылаахтар соһуйаллара: хайдах хаайыыга сытан маннык үөрэн-­көтөн ыллыахха сөбүй?

Эмискэ дьон куолаһыгар атын тыас холбоспута, бүтэйдик лүһүгүрээбитэ. Сотору буолаат, тулалара дьигиһийэ түспүтэ. Сир хамсаабыта! Хаайыы дьиэтэ түөрэҥнээн ылбыта, ол эрээри сууллубатаҕа.

Арай Павеллаах Сила көрбүттэрэ: хаайыы акылаатын таастара сыҕарыйбыттар, илиилэрэ, атахтара сыаптан босхоломмут, тахсар аан эмиэ аһыллыбыт.

Сир хамсааһыныттан хаайыы тойоно уһуктубута, ойон турбута. Ааннар бары аһаҕастар!

— Хаайыылаахтар куоппуттар! — дии санаабыта кини. — Миигин баспын быһар буолбуттар. Бэйэбин дьаһаммытым ордук буолууһук.

Кини болотун хостоон бэйэтин анньынаары турарын көрөн Павел хаһыытаабыта: «Куһаҕаны оҥостума! Биһиги бары манна баарбыт!»

Хаайыы тойоно ким да куоппатаҕын көрөн үөрбүтэ, мэктиэтигэр Павеллаах Силаны кууһан ылбыта. Өскөтүн бу дьону босхолоору сири хамсатар буоллаҕына, оччоҕо кинилэр кэпсиир Таҥаралара дьиҥ Таҥара эбит.

— Тойоннорум, быыһанар туһугар тугу гынабын?

— Айыы Тойон Иисуһу итэҕэй, оччоҕо быыһаныаҥ! — диэн хардарбыта Павел.

Бу кэнниттэн хаайыы тойоно кинилэри дьиэтигэр ыҥырбыта.

Павеллаах Сила үөрүүнэн барсыбыттара, олус элбэҕи кэпсээбиттэрэ: Иисус мэлдьи үтүөнү эрэ оҥорорун, дьиҥ Таҥара Уола буоларын дьоҥҥо итэҕэппитин, хайдах Рим буойуннара буруйа суох Иисуһу кириэскэ тиирбиттэрин… Кинилэри сойуолуулларын, кинилэр онтон соһуйбаттарын үллэстибиттэрэ. Иисуска сыһыаннаспыттарынааҕар кинилэргэ тоҕо үчүгэйдик сыһыаннаһыахтаахтарый? Иисус дьон, ол иһигэр кинилэр хас биирдиилэрин, аньыытын толуйаары өлбүтүн хаайыы тойонун дьиэ кэргэнигэр быһаарбыттара. Кириэскэ тиириллэн туран Кини киһи Таҥараны кытта сыһыана чөлүгэр түһэрин туһугар аньыыны Бэйэтигэр ылыммытын, онтон үс хонук буолан баран, Христос тиллибитин уонна Иисуһу итэҕэйэр дьону кытта Кини, Айыы Тыын нөҥүө, куруутун бииргэ буоларын кэпсииллэрин умнубатахтара.

— Мин эмиэ Иисустуун буолуохпун баҕарабын! — диэбитэ харабыл. — Киниттэн миигин Бэйэтин оҕотун курдук ылынарын туһугар көрдөһүөхпүн баҕарабын.

— Өскөтүн Таҥара дьахталлары эмиэ ылынар буоллаҕына, мин эмиэ Киниэхэ сулууспалыахпын баҕарабын, — кыттыспыта ойоҕо.

— Биллэн турар, Үтүө сурах дьахталларга эмиэ сыһыаннаах! Оҕолорго эмиэ! Эһиги куораккытыгар биир дьахтар хайыы-үйэ Христос батыһааччыта буолбута, — диэбитэ Павел.

Сэһэргэһии уонна сүрэхтэнии кэнниттэн хаһаайын Павеллаах Силаны остуолга ыҥырбыта. Күн тахсыбытын кэннэ кинилэр Лидия дьиэтигэр төннүбүттэрэ. Лидия кинилэр тустарыгар олус долгуйар этэ. Билигин Павел уонна Сила дьахтарга Таҥара хайдах араҥаччылыы сылдьыбытын эрэ туһунан буолбакка, хаайыы харабылын дьиэ кэргэнэ Айыы Тойону бу түүн ылыммытын туһунан эмиэ кэпсиир кыахтаахтара!