Иисус Христос Иоаҥҥа арыллыыта

Иисус Христос үгүс апостоллара Таҥараҕа тиһэҕэр диэри бэриниилээхтик Үтүө сураҕы тарҕаталларын иһин эрэйи-муҥу көрсүбүттэрэ эбэтэр өлөрүллүбүттэрэ. Ол эрээри биир апостол кырдьар сааһыгар диэри олорбута. Кини тоҕус уон сааһыгар өссө да Ефес куорат христианнарын түмсүүтүн чилиэнэ этэ. Ол Иоанн. Иоанны төһө да сойуолааталлар, өлөрбөтөхтөрө. Ол оннугар Средиземнэй байҕал Патмос диэн ааттаах иччитэх арыытыгар ыыппыттара. Онно хаайыылаахтар уонна кинилэри харабыллааччы эрэ бааллара. Чуумпу арыыга Таҥара Иоанныын кэпсэтэрэ. Кини Иоаҥҥа Иисус Ыраахтааҕы буоларын көрдөрбүтэ уонна өскөтүн христианнары сир аайы сойуолаһар да буоллахтарына, кинилэр дьылҕалара син биир Иисус илиитигэр баарын этэрэ!

Иоаҥҥа Таҥара аан дойду историятын бүтэр уһугун эмиэ арыйан көрдөрбүтэ. Бу көстүү уон икки этэ, ол туһунан Иоанн Библия бүтэһик кинигэтигэр – Арыллыыга суруйбута.

Бүтэһик көстүүгэ халлааннааҕы килбиэн олус кэрэ хартыынатын Айыы Тойон Аанньала көрдөрбүтэ. Бу хартыына Таҥара норуотугар бэлэмнэммит этэ. Иоанн апостол саҥа ырайы көрбүтэ, онно дьэп-дьэҥкир таас курдук күлүмүрдүүр олох өрүһэ Айыы Тойон уонна Агнец бөрөстүөлүн анныттан устара. Оттон өрүс кытылыгар олох маһа үүнэн турара.

Бу халлааннааҕы ырайга ким даҕаны аньыыны оҥорбот этэ, тоҕо диэтэр, аньыыны Иисус Христос кыайбыта. Аны аньыы, итэҕэйбэт буолуу уонна өлүү хараҥа түүнэ хаһан да төннүө суоҕа, Айыы Тойон Таҥара ону барытын эһиэҕэ. Оттон быыһаммыт итэҕэллээхтэр Христостуун Халлааннааҕы Саарыстыбаҕа үйэ тухары ыраахтааҕылыахтара.

Аанньал Иоаҥҥа тугу истибитэ уонна көрбүтэ барыта дьиҥнээх уонна кырдьыктаах диэн эппитэ.

Көстүү бүтүүтэ Айыы Тойон Иисус Бэйэтэ арахсаары туран апостолга эппитэ:

– Мин Альфа уонна Омега, Төрүт уонна Бүтэр Уһук, Бастакы уонна Тиһэх буолабын... Мин Давид удьуорабын уонна силиһэбин, сарсыардааҥҥы сырдык сулуспун! Мин сотору кэлиэм!

– Аминь! Кэлээр, Айыы Тойон Иисус! – диэн хардарбыта Иоанн.

Ыйытыктар:

1) Библия түмүк кинигэтин ким суруйбутуй?

2) Иисус иккистээн сиргэ туох сыаллаах кэлэрий?

3) Иисус Христоһу итэҕэйэр дьон үйэ тухары ханна олорор

буолалларый?