Петр хаайыыга

Рим императора Гай Цезарь Улуу Ирод сиэнин Ирод Агриппаны Иерусалим уонна Палестина улахан аҥаарын баһылыгынан анаабыта.

Кини баһылык буолуоҕуттан христианнар улахан сойуолааһыҥҥа түбэспиттэрэ. Иудея салайааччылара уонна кинилэри өйүүр дьон апостоллары уонна Христос бары үөрэнээччилэрин абааһы көрөллөрүн Ирод билэрэ. Ол иһин, кинилэри кытта үчүгэй сыһыан олохтоору, апостоллартан биирдэстэрин – Иоанн убайын Иакобы өлөрөллөрүгэр соруйбута. Иудейдар үөрүүнэн өлөрбүттэрин кэннэ, аны Петры тутарга соруйбута.

Петры хаайыыга уктаран баран, уон алта буойун күнүстэри-түүннэри кинини харабыллыылларыгар соруйбута.

Ирод хайыы-үйэ Петр апостолы өлөрөр күнү анаабыта. Сиэркэп кыһаллан туран кини туһугар Таҥараттан үҥэн көрдөһөрө. Атын апостоллар Ирод сойуолааһыныттан куотан бу кэмҥэ Иерусалимҥа суох этилэр. Ол эрээри, апостоллартан ураты, Иерусалимҥа элбэх Христос үөрэнээччилэрэ хаалбыттара. Кинилэр, Петр туһугар үҥээри, Иоанн ийэтин Мария дьиэтигэр мустубуттара.

Бу кэмҥэ Петр хаайыыга холкутук утуйа сыппыта. Кини таһыгар мэлдьи икки буойун баара. Ону таһынан, харабыллар хаайыы аанын ис уонна тас өттүгэр, өссө уулуссаҕа тахсар олбуор ааныгар эмиэ тураллара. Петр куотара кыаллыа дуо?! Суох. Кини куота да соруммат этэ.

Ол эрээри дьикти буолбута. Эмискэ Петр иннигэр Айыы Тойон Аанньала баар буола түспүтэ: кини сырдыгынан сыдьаайара. Аанньал кытаанахтык утуйа сытар Петры ойоҕоско анньан уһугуннарбыта:

– Түргэнник тур!

Инньэ диэтин кытта Петр илиититтэн сыаптар төлө барбыттара. Аанньал киниэхэ таҥнарыгар соруйбута. Харабыл буойуннар кытаанахтык утуйа сыталлара.

Онтон Аанньал эппитэ:

– Миигин батыс!

Петр кинини батыһан хаайыы аһаҕас аанынан тахсыбыта. Аанньал утуйа сытар харабыллар аттыларынан Петры олбуор тимир ааныгар диэри аҕалбыта. Олбуор аана кини иннигэр бэйэтэ тэлэллэн биэрбитэ. Кинилэр куоракка бииргэ тахсыбыттара, онтон кыратык бара түһэн баран Аанньал сүтэн хаалбыта.

Петр өйдөнөн кэлэн эппитэ:

– Мин Ирод уонна иудейдар илиилэриттэн өлүөхтээхпин Айыы Тойон Аанньалын ыытан быыһаата.

Ол кэнниттэн Петр кини туһугар итэҕэллээхтэр үҥэ олорор дьиэлэригэр тиийбитэ. Тоҥсуйбутугар биир чаҕар дьахтар тахсыбыта. Кини Петр куолаһын истээт, үөрүүтүттэн ааны арыйарын умнан, атыттарга Петр олбуор таһыгар кэтэһэн турарын кэпсии охсоору дьиэҕэ сүүрбүтэ. Үөрэнээччилэр кинини итэҕэйбэтэхтэрэ, Петры харабыллата Таҥара ыыппыт Аанньала дьиэ иннигэр кэлбитэ буолуо диэбиттэрэ.

Петр тоҥсуйарын тохтоппотоҕо. Доҕотторо олбуор аанын аһан, кинини көрөн баран олус соһуйбуттара. Үөрүүлэрэ муҥура суох этэ! Петр дьон истиэ диэн илиитинэн сапсыйан чуумпурдубута. Уоскуйбуттарын кэннэ Петр Айыы Тойон хайдах курдук дьиктитик кинини хаайыыттан быыһаабытын кэпсээбитэ.

Ол кэннэ Петр Иродтан куотан Иерусалимтан тахсан барбыта.