Павел Римҥэ айана

Павел аргыстарын кытта кинилэргэ кэлбиттэригэр Иерусалим сиэркэбэ хайдах курдук үөрбүтэй! Павел кини сулууспатын нөҥүө Таҥара атын норуокка тугу оҥорбутун кэпсээбитэ. Ону истэн бары Айыы Тойону, Кини тылын модун кыаҕын айхаллаабыттара. Хомойуох иһин, үөрүүлэрэ уһаабатаҕа.

Иерусалимҥа кэлбитэ сэттэ күн ааспытын кэннэ Павел мэктиэ тылы толоруу бэлиэтигэр сиэртибэ биэрээри храмҥа тиийбитэ. Онно иудейдар истиэхтэрин да баҕарбат Иисус Христостарын үөрэҕин тарҕатааччы диэн кинини билбиттэрэ. Тутан ылбыттара уонна биһиги сокуоммутун утары үөрэтэр, ону таһынан өссө атын норуоту аҕалан храмы киртитэр диэн үөгүлээбиттэрэ. Кинилэр абаран Павелы храмтан соһон таһаарбыттара, храм иһигэр өлөрөр бобуулааҕа. Рим буойуннарын салайааччы Клавдий Лисий хайдах куорат олохтоохторо аймаммыттарын көрөн, Павелы сыабынан кэлгийэн кириэппэскэ илдьэргэ соруйбута. Илдьэн истэхтэринэ Павел норуокка тыл этиэм этэ диэн көрдөспүтэ. Павел иудейдарга Таҥараны хайдах ылыммытын уонна кини аньыыларын Таҥара бырастыы гыммытын туһунан кэпсээбитэ. Иудейдар бастаан утаа Павелы болҕомтолоохтук истибиттэрэ, онтон Айыы Тойон кинини атын норуокка Таҥара тылын иһитиннэрэ ыыппытын эппитигэр аймана түспүттэрэ. Кинилэр бу киһи тыыннаах хаалара сатаммат диэн хаһыытыыллара. Клавдий Лисий билиэҥҥэ ылыллыбыт киһи тыла норуоту өссө күүскэ аймаабытын көрөн, Павелы кириэппэскэ илдьэ охсоллоругар дьаһайбыта. Павелы кырбыырга уонна доппуруостуурга соруйбутугар киһитэ эппитэ:

— Ама, эһиэхэ Рим олохтооҕун, буолаары буолан суута суох, накаастыыргыт көҥүллэнэр дуо?

Римляннар мух-мах барбыттара уонна доппуруоһу тохтоппуттара, ол гынан баран сыаптан босхолооботохторо.

Сарсыҥҥы күнүгэр Павелы синедриоҥҥа дьүүллээбиттэрэ. Быһаарсыы кэмигэр икки бөлөх ыккардыгар атааннаһыы тахсыбыта. Сорохтор кинини буруйдууллара, оттон сорох өттө туох да буруй баарын көрбөппүт диэн көмүскэһэллэрэ. Айманыы күүһүрэн испитэ. Иудейдар Павелы бары өттүттэн ыгаллара. Клавдий Лисий кинини билигин сэймэктиир буоллулар диэн куттанан, Павелы кириэппэскэ илтэрбитэ.

Түүн Павелга Айыы Тойон Иисус көстүбүтэ уонна эппитэ:

— Кытаат, Павел! Мин туспунан Иерусалимҥа туоһулаабытын курдук, Римҥэ эмиэ тылгын иһитиннэриэх тустааххын!

Уһун быһаарсыы кэннэ, ол быыһыгар иудейдар Павелы хас да төгүл өлөрө сатаабыттара, император суутугар ыытарга диэн быһаарбыттара.

Онон Павел Римҥэ тиийэн, Иисус Христос туһунан Үтүө сураҕы императорга бэйэтигэр тиэрдиэхтээҕэ. Итинник Айыы Тойон Бэйэтин былаанын толорбута.

Кесарияттан хараабылынан устан Павел Римҥэ айана саҕаламмыта. Кинилэри уһун уонна кутталлаах айан күүтэрэ.

Сыл бу кэмигэр Средиземнэй байҕалга үгүстүк күүстээх силлиэ түһэрэ, ол иһин кыра мас хараабылынан устар олус кутталлааҕа. Павел ол туһунан мотуруостары этэн көрбүтэ даҕаны, кинилэр ону истибэтэхтэрэ.

Айаннарын биир күнүгэр улахан силлиэ түспүтэ. Үрдүк долгуннар хараабылы талбыттарынан быраҕаттыыллара. Быыһанаары таһаҕастарын улахан аҥаарын ууга бырахпыттара даҕаны, балаһыанньалара күн-түүн мөлтөөн испитэ. Хас да күн устата хараабыл кыынньыбыт байҕал устун тыал ханна кыйдыыр да, онно уста сылдьыбыта. Дьон быыһанар эрэлэ сүппүтэ. Павел силлиэ быыһынан хаһыытаабыта:

— Доҕоттоор! Санааҕытын түһэримэҥ, ким да эһигиттэн өлүө суоҕа, хараабыл эрэ алдьаныа. Мин ону билэбин, Айыы Тойонум Аанньала бөлүүн миэхэ көстөн: «Куттаныма, Павел! Эн Рим ыраахтааҕытын иннигэр туруохтааххын!» — диэбитэ. Онон, доҕоттоор, сэргэхсийиҥ! Мин Айыы Тойоммор итэҕэйэбин: барыта Кини эппитин курдук буолуоҕа!

Силлиэ саҕаламмыта уон түөрт күн ааспытын кэннэ айанньыттар сири көрбүттэрэ, ол гынан баран кытылга кыайан тиксибэтэхтэрэ. Хараабыл чаардаан хаалбыта, тумсунан кумахха дириҥник анньыллан хамсаабат буолбута, оттон куорматын долгун тоҕута сынньан илдьэ барбыта. Ол да буоллар дьон бары быыһаммыта, кытылга тахсыбыта.

Айыы Тойон эрэннэрбитэ туолла! Өлүү-сүтүү суох! Иисус аата Римҥэ ааттанарын туһунан Таҥара былаана туолар буолла.

Павел дьиктитик быыһанан Римҥэ тиийэр буолла. Ону барытын Таҥара оҥордо. Кини онно император иннигэр туран, Иисус Христоска итэҕэлин туоһулуур кыахтаммытыттан Айыы Тойоҥҥо махтаммыта.

Павел Рим куоракка, хаайыылаах курдук буолбакка, Иисус туоһулааччыта, Халлааннааҕы Ыраахтааҕы ыыппыт киһитэ буолан киирбитэ!

Ыйытыктар:

1) Клавдий Лисий тоҕо Павелы синедриоҥҥа дьүүллэппитий? Онно туох буолбутуй?

2) Айыы Тойон хаайыллыбыт апостол санаатын хайдах бөҕөргөппүтүй? Павелга ити тоҕо улахан суолталааҕый?

3) Устан истэхтэринэ туох буолбутуй?

4) Туох сыаллаах Таҥара Павелы Римҥэ ыыппытый?