Эммаус суолугар көрсүһүү

Курутуйбут уонна хараастыбыт икки үөрэнээччи Иерусалимтан Эммаус куоракка баран испиттэрэ. Кинилэр бүтэһик күннэргэ туох буолбутун ырыта, өйдүү сатыы, бэйэ-бэйэлэрин кытта кэпсэтэ испиттэрэ. Кинилэр Иисуһу батыһаллара, улуу сирдьит буолан, Бэйэтин норуотун босхолуо диэн эрэнэллэрэ. Оттон билигин Кини өлбүт... Ол эрээри куоракка Иисус тиллибит диэн сурах тарҕаммыта... Бу сонуну истэн кинилэр ордук мунаахсыйбыттара.

Ити курдук кэпсэтэ истэхтэринэ, кинилэргэ биир Айанньыт холбоспута. Бу Иисус этэ. Айыы Тойон Кинини үөрэнээччилэрэ билбэт гына оҥорбута.

Онон уолаттар харахтара бааллан, Кинини билбэтэхтэрэ. Ханнык эрэ кэмҥэ Иисус аттыларынан саҥата суох хаамсан испитэ, онтон ыйыппыта:

– Эһиги туох туһунан суолу быһа кэпсэтэ иһэҕит? Уонна туохтан эһиги санааҕыт түстэ?

– Бу күннэргэ Иерусалимҥа туох буолбутун билбэт курдук ыйытаҕын! – диэн хардарбыта биирдэстэрэ.

Ол кэннэ үөрэнээччилэр Киниэхэ бүтэһик күннэргэ туох буолбутун кэпсээбиттэрэ. Кэпсээн бүтэн баран, санааҕа баттатан саҥата суох хааман испиттэрэ. Үөрэнээччилэри холкутук истэн баран, Иисус тиһэҕэр дьэ Бэйэтэ саҥарбыта:

– Ама эһиги Ытык Суруйууларга туох туһунан этиллэрин өйдүүр кыаххыт суох дуо? Өйдүүргүт эбитэ буоллар, маннык быһыы-майгы буолуохтааҕын билиэх тустаах этигит. Христос, Таҥара Уола, дьон аньыытын туһугар эрэйи-буруйу көрсөн өлүөхтээх этэ, ол кэннэ тиллэн, Таҥараны албан аатырдыахтааҕа! Бу туһунан Ытык Суруйууларга Моисейга, Псаломнарга уонна пророктарга элбэхтэ этиллэр.

Кини Суруйуулартан элбэх быһа тардыыны эппитэ. Улахан аҥаарын кинилэр билэр этилэр, ол гынан баран сыыһа өйдүүллэрэ, эбэтэр пророктар төлкөлөөн эппиттэрин итэҕэйбэттэрэ, эбэтэр умнубуттар. Оттон билигин кинилэр харахтара арыллыбыта. Кырдьык даҕаны! Суруйууларга курдук барыта буолбут эбит! Кинилэр Айыы Тойонноро уонна Үөрэтээччилэрэ дьону Рим императорын былааһыттан босхолоору буолбакка, аньыыларыттан быыһаары кэлбит эбит. Кини алҕас өлбүт буолбатах, иккистээн тиллээри өлбүт. Хайдах кинилэр итини эрдэ өйдөөбөтөхтөрө эбитэ буолла!

Үөрэнээччилэр билбэт киһилэрин иһиттэхтэрин аайы санаалара көтөҕүллэн испитэ. Ол гынан баран кинилэр Кимниин баран иһэллэрин сэрэйбэттэрэ.

Эммауска чугаһаан баран кинилэри кытта бииргэ аһыырыгар уонна хоноругар ыҥырбыттара. Билбэт киһилэрэ сөбүлэспитэ. Ас бэлэм буолбутун кэннэ Кини килиэп туһугар Таҥараҕа махтаммыта уонна килиэби тоһутан иккиэннэригэр биэрбитэ.

– Иисус урут наар итинник гынара, дьэ дьиибэ эбит, – дии санаабыттара иккиэн.

Онтон эмискэ харахтара аһыллыбыта: кинилэр иннилэригэр Иисус олорор! Бастаан кинилэр Иисуһу билбэтэхтэрэ, онтон билигин саарбахтааһын суоҕа – бу кырдьык Кини!

Бу кэмҥэ Иисус эмискэ көстүбэт буолан хаалбыта.

Хайдах кинилэр эрдэ билбэтэхтэрэй! Кини Ытык Суруйуулары быһаарар кэмигэр кинилэр сүрэхтэрэ өрүкүйбүтэ эбээт! Билигин Иисус кинилэр аттыларыгар суох да буоллар, икки доҕордуулар аны санаарҕаабат этилэр. Иисус тыыннаах! Үөрүүлэрэ улахана бэрт буолан, кинилэр атын үөрэнээччилэргэ кэпсии охсуохтарын баҕарбыттара. Сонно тута хомунан, Иисус үөрэнээччилэрэ бары кэриэтэ түмсүбүт сирдэригэр Иеруслаимҥа ыксалынан төттөрү барбыттара.

Ыйытыктар:

1) Эммауска барар суолунан хас үөрэнээччи баран испитий? Кинилэр туохтан санаарҕаабыттарый?

2) Кинилэр Кими көрсүбүттэрий?

3) Кинилэр Иисуһу хайдах билбиттэрий?