Петр уонна Иоанн хоруоп аттыгар
Библия, Иоанн Евангелиятын 20 түһүмэҕин 1-10 хоһоонноро
Мария куоракка тиийээт, Иисус үөрэнээччилэрин – Петры уонна Иоанны булбута.
– Айыы Тойоммутун ылан барбыттар, – диэбитэ кини, – аны биһиги Кинини ханна уурбуттарын билбэппит.
Кини Иисус билигин тыыннаах, тиллибит диэн санаан да көрбөтөҕө!
Биллэн турар, Петрдаах Иоанн олус соһуйбуттара. Кинилэр төһө кыалларынан түргэнник хайа хаспаҕар ыстаммыттара. Иоанн бастыҥ сүүрүк этэ, онон Аримафеяттан сылдьар Иосиф саадыгар бастакынан тиийбитэ. Кини кырдьык хаспах аанын таас бүөлээбэтин илэ хараҕынан көрбүтэ. Иһирдьэ киирбэккэ эрэ, өҥөйөн көрбүтэ. Тугун дьиктитэй! Өлүк суох, арай суулаабыт таҥастара саас-сааһынан хомуллан сытар. Иоанн хаспах иннигэр турбута. Петр кэлэн хаспахха киирбитэ – Иисуһу суулаабыт таҥастара уонна былаат туспа хомуллан сыталлара. Өскөтүн, Мария Магдалина сабаҕалыырын курдук, өлүгү кырдьык уоруйахтар илдьэ барбыттара эбитэ буоллар, таҥаһы итинник бэрээдэктээн хаалларыахтара суоҕа этэ.
Петр кэнниттэн Иоанн хаспахха эмиэ киирбитэ. Кини көрөөт, сонно тута өйдөөбүтэ: Иисус тыыннаах! Ол иһин хаспах иччитэх!
Ити кэнниттэн Петрдаах Иоанн куоракка төннөн, Христос атын үөрэнээччилэрин уонна дьахталлары көрсүбүттэрэ. Кинилэр Иисус тыыннааҕын уонна Кинини көрбүттэрин эппиттэрэ! Иисус өллө диэн курутуйбут, ытаабыт-соҥообут үөрэнээччилэр уонна батыһааччылар үгүстэрэ ити үөрүүлээх сонуну итэҕэйбэтэхтэрэ.
Ыйытыктар:
1) Мария Магдалина Петрдаах Иоаҥҥа туох сонуннаах кэлбитий?
2) Петр уонна Иоанн хаспахха тугу көрбүттэрий?
3) Иоанн иччитэх хаспаҕы көрөн баран туохха итэҕэйбитий?