Авраам Таҥараҕа тапталын тургутуу

Авраамнаах Сарра уол оҕолонуохтарыттан кинилэр дьиэ кэргэн дьоллоро өссө үксээбитэ. Бары үһүөн Таҥараны уонна бэйэ-бэйэлэрин таптыыллара. Авраам баай-талым олохтооҕун эһиги билэҕит. Ол гынан саамай күндү баайа, сүрэҕин чопчута — уола Исаак этэ. Кинини Авраам сир үрдүгэр туохтан да күүскэ таптыыра, арай Таҥараҕа таптала эрэ оннооҕор күүстээҕэ.

Биирдэ Айыы Тойон Авраам Киниэхэ тапталын уонна итэҕэлин дириҥин тургутан көрүөн баҕарбыта. Ол иһин Авраамҥа эппитэ:

— Соҕотох тапталлаах уолгун Исаагы ылаҥҥын, мин этэр хайабар илдьэн, толук биэр.

Бу Авраамҥа олус да ыар этэ. Ол да буоллар кини, Таҥараны ис сүрэҕиттэн таптыыр буолан, Айааччытын хайа да соругун толорорго бэлэмэ. Авраам мас хайытан өсүөлүгэр уурбута, Исаагы уонна икки кулуту илдьэ айаҥҥа туруммуттара. Оттон Сарра дьиэтигэр хаалбыта. Айаннара уһун этэ, хара сарсыардаттан киэһэ хойукка диэри айаннаабыттара, хам-түм кылгастык тохтоон ылаллара. Исаак ханна айаннаан иһэллэрин билиэн олус баҕарбыта: «Аҕам тоҕо эрэ эппэт, туох эрэ биричиинэлээх буоллаҕа», — диэн толкуйдуура Исаак.

Авраам кырдьык сатаан эппэт этэ. Баралларыгар Таҥара киниэхэ санаатыгар сатаан батарбат дьулаан суолун эппитэ. Дьиҥэ Таҥара Исаак өлөрүн баҕарбат этэ. Ол эрээри Авраам Киниэхэ бэриниитин тургутан көрөр баҕалааҕа.

Авраам буоллаҕына ону билбэккэ, соҕотох уолун толук биэрэ баран иһэриттэн санаата олус күүскэ оонньуура. Ол эрээри, төһө да ыарахан буолбутун иһин, Таҥара соругун толорор санаалааҕа.

Үрдүк хайаҕа дьэ тиийбиттэрэ. Исаак сатаан тулуйбатаҕа:

— Аҕаа, кутааҕа уматар маспыт, уоппут баар, оттон толук биэрэр хойбут оҕото ханнаный?

Авраам уолугар кырдьыгы этэрэ олус ыарахан этэ, саҥатыттан маппыта.

— Тоойуом, Таҥара толукка бэриллэр хойун оҕотун Бэйэтэ көрөн булар, — диэн нэһиилэ саҥа таһаарбыта.

Дьэ, кинилэр Таҥара эппит хайатыгар тиийэн кэлбиттэрэ уонна таас хомуйан киирэн барбыттара. Авраам таастары өрөһөлөөн, мастарын ууран, толук биэрэргэ орун оҥорбута. Ол кэннэ Кини уолун Исаагы кэлгийэн баран, мас үөһэ сытыарбыта уонна быһаҕынан анньаары илиитин күөрэппитэ!

Ол кэмҥэ халлаантан дуорааннаах саҥа иһиллибитэ:

— Авраам, Авраам!

Оҕонньор быһаҕын уолун үрдүгэр туппутунан таалан турбута.

— Баарбын, — диэн Авраам хардарбыта.

— Оҕоҕун тыытыма! — диэбитэ халлаантан иһиллэр куолас. — Билигин эн Миэхэ бэриниилээххин, Мин туспар оннооҕор соҕотох уолгун харыһыйбаккын көрдүм!

Авраам сүрэҕиттэн тааһы түһэрбит курдук чэпчээбитэ уонна үөрүүтүттэн тобуктуу түспүтэ. Илиитэ салҕалыы-­салҕалыы оҕотун сүөрбүтэ уонна турарыгар көмөлөспүтэ. Аҕалаах уол куустуспуттара уонна, хомойон буолбакка, улуу үөрүүлэриттэн ытаспыттара.

Авраамнаах Исаак олох чугас хой бээҕиниирин истибиттэрэ. Арай көрбүттэрэ — муоһуттан талахха иҥнибит эбит. Ол хойу толук оҥостубуттара. Таҥара, Авраам эппитинии, итинник Бэйэтигэр толугу булуммута.

Хайаттан аҕа уонна уол илии илиилэриттэн тутуһан, үөрэн-­көтөн, чэпчээн түспүттэрэ. Иккиэн киһини таптыыр уонна Таҥараны таптыыр диэн тугун туһунан толкуйдууллара. Уонна Таҥара киһиэхэ таптала хайдахтаах да тапталтан, итэҕэйэргэ ыарахан да буоллар, күүстээҕин кинилэр итэҕэйбиттэрэ.