Эрэннэриллибит уол оҕо

Авраам уонна Сарра Ханаан сиригэр отуу оҥостон олорбуттара. Кинилэр оҕолоро суоҕа. Саастара ырааппыт этэ: Авраам сүүс, оттон Сарра тоҕус уон кэриэтэ саастаахтара.

Биир түүн Таҥара Авраамҥа эппитэ:

— Халлааны көр эрэ. Тугу эн көрөҕүн?

Түүҥҥү халлаан киһи кыайан аахпат элбэх сулуһунан толору бүрүллүбүт этэ. Онуоха Таҥара эппитэ:

— Бу халлааҥҥа хас сулуһу көрөҕүн да — оччо ыччаттаныаҥ. Кинилэр бары Ханаан сиригэр олохсуйуохтара. Мөлтөх өйдөөх-­санаалаах норуот бу сиртэн үүрүллүөҕэ.

Оччолорго Авраам оҕото суох да буоллар, Таҥараҕа эрэммитэ. Кини сөпкө гынара — хаһан баҕарар Айыы Тойон тылын халбаҥнаабакка итэҕэйэрэ, тоҕо диэтэр, Таҥара мэлдьи кырдьыгы эрэ этэр уонна эппит Тылын хайаан да толорор.

Биирдэ Авраам отуутун айаҕар олорон, ыраахтан дьон иһэрин көрбүтэ. Авраам тута кинилэргэ утары сүүрэн тиийбитэ, сүгүрүйбүтэ уонна биирдэстэригэр эппитэ:

— Тойонуом, мин отуубар киириҥ. Эһиэхэ уу аҕалан атаххытын сууйалларыгар соруйуоҕум. Салгыы айанныыр гына аһатыам, тоторуом уонна сынньатыам.

Айанньыттар үһүөн сөбүлэспиттэрэ.

Ити айанньыттар эһиги санааҕытыгар кимнээхтэрий? Ити аанньаллар этэ. Кинилэр халлаантан түһэн, Авраамҥа Таҥараттан үөрүүлээх сураҕы аҕалбыттара. Таҥара Бэйэтин илдьитин сороҕор аанньалларынан дьоҥҥо ыытарын эһиги билэҕит дуо?

Аанньаллар отуу таһынааҕы мас күлүгэр сынньана олорбуттара. Ол кэмҥэ Авраам отуутун иһигэр Сарраҕа эппитэ:

— Түргэнник саамай үчүгэй бурдуктан килиэптэ буһара оҕус!

Онтон Авраам саамай үчүгэй ньирэйин талбыта, кулутун дьаһайбыта:

— Түргэнник буһара оҕус.

Ас бэлэм буолбутун кэннэ Авраам бэйэтэ айанньыттарын аһаппыта. Кинилэр аһыыр кэмнэригэр Авраам аттыларыгар мас анныгар турбута.

Аһыы олорон ыалдьыттартан биирдэстэрэ ыйыппыта:

— Ойоҕуҥ Сарра ханна баарый?

— Отуутун иһигэр олорор, — хардарбыта Авраам.

— Эһиил баччаларга мин эһиэхэ кэлиэҕим, онно Сарра уол оҕолоох буолуоҕа.

Сарра аанньал этэрин истибитэ эрээри, бачча сааһыгар уол оҕолонуоҕун итэҕэйбэтэҕэ. Ол иһин иһигэр күлбүтэ.

— Ити Сарра туохтан күлэрий? — аанньал ыйыппыта. — Кырдьык уолланыаҕа! Таҥараҕа, ама, туох кыаллыбат буолуой?

Айанньыттар салгыы айаннарыгар туруммуттара. Оттон Авраам кинилэри атааран баран отуутугар төннүбүтэ.

Таҥара Бэйэтин эрэннэриитин толорбута буолуо дуо? Биллэн турар, Сарра биир сылынан уол оҕону төрөппүтэ. Киниэхэ Исаак диэн ааты биэрбиттэрэ. Авраамнаах Сарра олус дьолломмуттара. Уоллара Исаак олус истигэн оҕо этэ, кинини Таҥара таптыыра.

Таҥара эрэннэриитин толорбута. Кини Авраамнаах Сарра уол оҕолонуохтара диэбитэ уонна кинилэргэ уол оҕону биэрбитэ. Авраам Таҥара эрэннэрбитин итэҕэйэн сөпкө гыммыта. Айыы Тойон маннык күүстээх итэҕэли сөбүлүүр, ол иһин «Авраам кырдьыксыт киһинэн билиниллибитэ».

Таҥара эппитин толору эрэнэр сөп, тоҕо диэтэххэ, Айыы Тойон кыаҕа сүдү, Киниэхэ кыаллыбат диэн туох да суох!

Ыйытыктар:

1) Таҥара төһө элбэх удьуору Авраамҥа биэриэх

буолан эрэннэрбитий?

2) Авраам киниэхэ кэлбит айанньыт көрүҥнээх

аанньаллары хайдах көрсүбүтүй?

3) Кинилэр Авраамнаах Сарраҕа туох илдьити аҕалбыттарый?

4) Таҥара Бэйэтин эрэннэриитин толорбут дуо?

5) Тоҕо Таҥара Авраамҥа үтүө сыһыаннааҕый?