Иисус тиллиитэ

Халлаан сырдыан иннинээҕи борук-­сорукка Иерусалим кыараҕас уулуссаларынан санааҕа ылларбыт дьахталлар хааман иһэллэрэ — икки Мария уонна Саломия. Тоҕо кинилэр маннык санаарҕаабыт көрүҥнээхтэрий? Алдьархай буолбут: кинилэртэн хас биирдиилэригэр улахан үтүөлээх Иисус өлбүт! Кинилэр аны хаһан даҕаны Иисуһу истибэттэр, уруккуларын курдук көмөлөһөр кыахтара суох. Кинилэр Үөрэтээччилэрин ытыктыылларын бүтэһигин биллэрэн — Кини тыыммат буолбут өлүгүн сыттаах арыынан билигин сотор баҕалаахтара.

Баран иһэн кинилэр олус долгуйбуттара: хайа хаспаҕын бүөлүүр улахан тааһы хайдах бэйэлэрэ сыҕарыталлара эбитэ буолла? Кэмниэ кэнэҕэс кинилэр Иисус сытар хайатын хаспаҕа баар саадыгар тиийбиттэрэ. Хайа, бу тугуй? Таас сыҕарытыллыбыт, хаспах аана аһаҕас! Дьахталлар чугаһаан кэлбиттэрэ, тула ким да суох этэ. Кинилэр сэрэнэн иһирдьэ киирбиттэрэ. Арай көрбүттэрэ Иисус өлүгэ сыппыт таас ыскаамыйата кураанах. Туох буолбутуй? Ама Иисус өлүгүн ким эрэ уорбут дуо?

Кинилэр Иисус тиллибитин билбэт этилэр. Дьэ ол иһин хайа хаспаҕа кураанаҕа.

Сарсыарда эрдэ улууканнаах дьикти буолбута: Христос тиллибитэ! Халлаантан сырдыгынан сандаарар Аанньал түһэн, киирэн көрбүт киһи Иисус онно чахчы суоҕун итэҕэйэр гына, тааһы сыҕарыппыта. Таас хаспаҕы харабыллыыр буойуттар кутталларыттан атахха биллэрбиттэрэ.

Оттон дьахталлар өссө ону билбэт этилэр, кинилэр хайа хаспаҕа кураанаҕын эрэ көрбүттэрэ. Мария Магдалина олус санаарҕаабыта. Кини атын дьахталлар тугу гыналларын толкуйдуур кэмнэригэр бу сонуну Петрга уонна Иоаҥҥа кэпсээри куоракка сүүрбүтэ. Эмискэ кинилэр сырдыгынан сыдьаайар таҥастаах Аанньалы көрбүттэрэ. Аанньал кинилэргэ дьикти сонуну эппитэ:

— Иисус тыыннаах! Куттанымаҥ! Түргэнник куоракка төннүҥ уонна үөрэнээччилэргэ Иисус тиллибитин кэпсээҥ!

Ыйытыктар:

1) Нэдиэлэ бастакы күнүгэр туох улуукан дьиктитэ буолбутуй?

2) Бу сарсыарда дьахталлар ханна уонна туох сыаллаах барбыттарый?

3) Хайа хаспаҕын харабыллыыр буойуннар Аанньалы көрөөт, хайдах буолбуттарый?

4) Аанньал дьахталларга тугу эппитий?