Иисуһу кириэскэ тиирии

Рим буойуннарын этэрээтэ өлөрүүгэ ууруллубут Иисуһу уонна икки ороспуойу ыксатан кымньыынан таһыйа-­таһыйа, Рим олохтоохторо буруйдаахтары кириэскэ тиирэр сирдэригэр үүрэн испитэ. Кинилэри олус элбэх киһи кэннилэриттэн батыспыта. Бу сир Голгофа эбэтэр Бас уҥуоҕа диэн ааттааҕа. Рим олохтоохторугар эбии накаастабыл баара: буруйдаах, төһө да кырбаннар, кириэһин бэйэтэ сүгэн илдьиэхтээҕэ. Онон ыарахан мас кириэһи Иисус Бэйэтэ сүгэн илдьэригэр тиийбитэ.

Суолун аҥаарыгар Кини күүһэ олох эстибитэ. Этэрээт салайааччыта Киринеяттан төрүттээх Симоҥҥа Иисус оннугар кириэһи сүгэригэр соруйбута. Батыһан иһэр дьон ортотугар элбэх дьахтар баара, кинилэр Иисус эрэйдэнэрин көрөн, аһынан ытыыллара-­соҥууллара.

Өлөрөр сиргэ кэлэн баран, буойуннар Иисус илиитин-­атаҕын сиргэ сытар кириэскэ хам тоһоҕолоон, дьулаан үлэлэрин оҥорбуттара. Оҥхой хаспыттара, онно кириэһи туруорбуттара уонна кытаатыннаран биэрбиттэрэ. Буойуннар анараа икки буруйдааҕы эмиэ ити курдук дьаһайбыттара. Кинилэр кириэстэрин Иисус хаҥас уонна уҥа өттүгэр туруорбуттара.

Өлөрөр сиргэ диэри Иисуһу хас даҕаны чугас доҕоро — эр дьон уонна дьахталлар — арыаллаабыттара. Дьахталлар ытыыллара. Тэйиччи соҕус турар дьон Иисуһу күлүү-элэк гынан этэллэрэ:

— Өскөтүн Эн Таҥара Уола буоллаххына, Бэйэҥ Бэйэҕэр көмөлөс уонна кириэстэн түс! Оччоҕо биһиги Эйигин итэҕэйиэхпит!

Кириэскэ тиириллибит ороспуойдартан биирдэстэрэ Иисуһу үөҕэрэ. Оттон атына, төттөрүтүн, бастакытын буойара:

— Тохтоо эрэ! Биһиги бэйэбит буруйбутугар накаастанныбыт, оттон Кини туох да куһаҕаны оҥорботоҕо!

Итини этэн баран бу ороспуой Иисустан көрдөспүтэ:

— Тойонуом, Саарыстыбаҕар тиийдэххинэ миигин санаар!

Иисус хардарбыта:

— Эрэннэрэбин, эн күн бүгүн Миигинниин ырайга буолуоҕуҥ!

Бу кэннэ тулалыыр эргини эмискэ им балай хараҥа бүрүйбүтэ. Сир дьигиһийбитэ.

Иисус этинэн-­сиининэн эрэйдэниитэ сиэри таһынан этэ, ол гынан баран дууһатын моруута оннооҕор ыарахана. Аан дойду аньыыта-­харата Киниэхэ сүктэриллибитэ. Хас да чаастаах кыайан этиллибэт ыарахан сор-муҥ кэнниттэн Иисус соҕотохсуйан улаханнык хаһыытаабыта:

— Таҥарам! Таҥарам! Эн Миигин тоҕо хааллардыҥ?

Иисус аан дойду аньыытын иһин Халлааннааҕы Аҕатын бары уорун-­кылынын Бэйэтигэр билбитэ. Маннык уордайыыны ханнык да аньыылах киһи кыайан тулуйбат. Христос эрэ, Таҥара уонна Киһи, тулуйар кыахтаах.

Им балай ааспыта, оттон Иисус бүтэһик тылларын эппитэ:

— Туолла! Аҕаа! Тыыммын Эйиэхэ туттарабын!

Итини этээт, тыына быстыбыта. Кини төбөтө санньыйбыта. Иисус өлбүтэ.

Аримафеяттан сылдьар Иосиф диэн биллиилээх уонна баай киһи Иисуһу таптыыра эрээри, кутталыттан ону урут кистиирэ. Кини ити киэһэ Пилакка тиийэн, Иисус өлүгүн кириэстэн устары, Иудея үгэһинэн көмөрү көҥүллүүрүгэр көрдөспүтэ. Рим тойоно көҥүллээбитэ.

Хаһан эрэ түүн Иисуска кэлэ сылдьыбыт, онтон ыла Христос кистэлэҥ батыһааччыта буолбут Никодим Иосифка көмөлөспүтэ. Кини иудейдары көмөр үгэһинэн туох наадатын барытын аҕалбыта: суулуур таҥаһы, үчүгэй сыттаах смирна арыытын уонна алоэны. Иисус этин-сиинин кичэйэн арыынан соппуттара уонна кыһанан таҥаһынан суулаабыттара. Ол кэннэ кириэскэ тиирбит сирдэриттэн чугас баар таас хайа саҥа хаспаҕар Кинини аҕалбыттара. Таас хайа хаспаҕар киирэр ааны улахан хаптаҕай тааһынан бүөлээн баран, дьиэлэригэр барбыттара.

Сарсыҥҥы күнүгэр архиерейдар уонна фарисейдар Иисус үһүс күнүгэр тиллиэм диэн эппит тылларын санаан кэлбиттэрэ. Кинилэр Пилакка кэлэн таас хаспаҕы буойуннар харабыллыылларыгар көрдөспүттэрэ. Үөрэнээччилэрэ Иисус өлүгүн уоран ылан баран, Кини тилиннэ диэхтэрэ диэн куттаналлара. Пилат хайа хаспаҕын харабыллыырга буойуннары анаабыта. Ону таһынан хаспахха хайдах да кистээн киирбэттэрин курдук, иудейдар хаспах аанын бэчээттээбиттэрэ. Ити курдук былаастар өлбүт Иисуһу кыһаллан туран харабыллаабыттара, тоҕо диэтэр, айдаан тахсыа диэн куттаналлара

Ыйытыктар:

1) Иисуһу кириэскэ тиирээри ханна илдьибиттэрий? Киниэхэ кириэһи сүгэригэр ким көмөлөспүтүй?

2) Иисус өлүүтэ биһиэхэ туох сүдү суолталааҕый?

3) Аримафеяттан төрүттээх Иосиф Иисуһу таптыырын хайдах дакаастаабытый? Кини тугу оҥорбутуй?

4) Синедрион чилиэннэрэ Иисус өлбүтүн кэннэ туох кыһалҕаламмыттарый?