Иисус Пилат иннигэр
Библия, Лука Евангелиятын 23 түһүмэҕин 1-25 хоһоонноро
Сарсыҥҥы күн сарсыардатыгар буойуннар Иисуһу Рим императорын биир прокураторыгар Пилакка аҕалбыттара. Өлөрөрү дуу, босхолууру дуу кини быһаарыахтааҕа. Дыбарыаһын иннигэр көй дьон бэлиэр мустубут этэ. Пилат мустубут дьоҥҥо биллэрбитэ:
– Мин бу Киһиэхэ өлөрөр уурааҕы таһаарарым кыаллыбат. Ол иһин Кинини накаастаан баран, босхо ыытарга соруйуом.
– Суох, суох! – диэн хаһыытыы түспүтэ дьон. – Кинини кириэскэ тиир! Кириэскэ тиир!
Пилат хайдах гыныай? Бу дьон Иисуһу өлөрөр уурааҕы таһаарарга кинини күһэйэрэ. Ол гынан баран Пилат Кини буруйа суоҕугар итэҕэйэрэ. Киниэхэ санаа көтөн түспүтэ:
«Еврейдэргэ Паасха бырааһынньыгар биир хаайыылааҕы босхолуур үгэс баар. Өскөтүн мин өлөрүөхсүт Варавваны кытта Иисуһу таллардахпына, биллэн турар, кинилэр Иисуһу талыахтара». Итинник санаан баран,
Пилат доргуччу эппитэ:
– Быйыл мин кими эһиэхэ босхолуубунуй: Иисуһу дуу, Варавваны дуу?
– Варавваны, Варавваны, Варавваны! – диэн норуот хаһыытаабыта.
Хаһыы дыбарыас иһинээҕи тэлгэһэҕэ тиийэ иһиллэрэ. Онно баар Рим буойуннара Иисуһу аһыммакка кырбаан, күлүү-элэк оҥостон сордообуттара. Кинилэр Иисуска ыраахтааҕы кыһыл мантиятын уонна хатыылаах ыарҕаттан өрүллүбүт мэнньиэһи хоруона оннугар кэтэрдибиттэрэ.
– Иудея ыраахтааҕыта, үөр-көт! – диэн күлүү гынан улаханнык хаһыытыыллара, этэ-сиинэ бүтүннүү кыа хаан буолуор диэри кымньыынан таһыйаллара.
Сору-муҥу тулуйбут Иисуһу дьон аһыныа диэн Пилат эрэнэ санаабыта. Кини Иисуһу дьоҥҥо таһаарбыта да, ким даҕаны аһынар санаата суоҕа. Дьон үөгүлүүрэ:
– Кириэскэ тиир! Кириэскэ тиир!
Пилат мантан атын хайдах да гынан быыһыыр кыаҕа суоҕа. Кини суунар тааһы аҕалалларыгар соруйбута, онно дьон бары көрөн турдахтарына илиитин суунан баран эппитэ:
– Бу Кырдьыксыт хаана тохторугар мин буруйум суох! Бэйэҕит быһаарыҥ! Мин Кинини кириэскэ тиирэллэригэр соруйуом, ол эрээри буруй эһиэхэ буолуоҕа!
Ол кэннэ Пилат Варавваны босхолуурга соруйбута, оттон Рим буойуннара Иисуһу салгыы күлүү-элэк гына хаалбыттара.
Ыйытыктар:
1) Пилат Иисуһу дьон өстүйүүтүттэн хайдах
гынан быыһыы сатаабытый?
2) Дьон тоҕо Варавваны талбытый?
3) Иисус туох сору-муҥу тулуйбутуй?