Петр мэлдьэһиитэ

Бээтинсэ сарсыардата буолбута. Иисуһу Каиафа диэн ааттаах архиерейга аҕалбыттара. Кини дьиэтигэр синедрион (итэҕэллээхтэр үрдүк сууттара) Иисуһу доппуруостаары уонна бириигэбэр таһаараары мустубута.

Петр Үөрэтээччитин ыраахтан батыһан испитэ. Кини Иисуһу доппуруостуур дьиэлэрин тиэргэнигэр киирбитэ. Тымныы буолан, буойуннар уонна чаҕардар тиэргэн ортотугар кулуһун оттон иттэ олорбуттара. Петр кинилэр аттыларыгар кэлэн олорбута.

— Эн Иисус үөрэнээччилэриттэн биирдэстэрэ буолбатаххын дуо, эбэтэр мин сыыһабын дуу? — диэн эмискэ чаҕар дьахталлартан биирдэстэрэ ыйыппыта.

— Суох, суох, оннук буолбатах, — диэн Петр итэҕэтэ сатаабыта.

Соторутааҕыта аҕай Иисуска хаһан даҕаны аккаастаныам суоҕа диэн эрэннэрэн баран, ити курдук бастакытын мэлдьэспитэ.

Петр тиэргэҥҥэ кулуһун аттыгар олоруоҕуттан чаас кэриҥэ ааспыта. Кини Үөрэтээччитин сууттааһыны барытын көрбүтэ уонна истибитэ. Дьон быыһыгар саһан кини синедрион мунньаҕа бүтэрин кэтэһиэн баҕарбыта.

Сотору буолаат, чаҕардартан биирдэстэрэ Петры көрөн эппитэ:

— Эн Кинини кытта бииргэ сылдьыбытыҥ эбээт!

Петр утарыласпыта:

— Иисустуун дуо? Мин Кинини отой билбэппин!

Ити курдук кини Иисус үөрэнээччитэ буоларын иккистээн мэлдьэспитэ.

Бу кэмҥэ суут хоһугар улахан айдаан тахсыбыта. Иисуһу үтүрүйэллэрэ, күлүү-элэк оҥостоллоро, оттон сорохтор кырбыыллара.

Петрга ким эрэ эмиэ эппитэ:

— Кырдьык эн кинилэртэн биирдэстэрэҕин! Саҥараргыттан да биллэр!

Үөрэтээччитин кытта дьулааннык, хаҕыстык сыһыаннаспыттарын Петр көрбүтэ. Аны миигин итинник сордуохтара диэн:

— Ити Иисуһу билбэппин! — диэбитэ.

Ити кэмҥэ бөтүүк саҥа күн үүммүтүн биллэрэн хаһыытаабыта.Дьэ, онно Петр ааспыт күн киэһэтигэр, Паасханы бэлиэтиир аһылык кэмигэр Иисус: «Бөтүүк да хаһыытыы илигинэ эн Миигиттэн үстэ аккаастаныаҥ!» — диэн эппит тылларын өйдөөн кэлбитэ. Билигин аҕай билэрин мэлдьэспит Үөрэтээччитин диэки көрбүтэ — Иисус эмиэ кинини көрөн турара.

Олус кыбыстыбыта, кутурҕан ыга кууспута. Кини иэйэн-­куойан туран ытаабыта уонна бу тэлгэһэттэн киэр куоппута. Үөрэтээччитин бу көрүүтүн кини кэлин хаһан да умнубатаҕа.