Иисуһу тутуу

Саад аттыгар дьон тоҕуоруспута. Кинилэр суолларын уотунан сырдатыналлара, ороспуонньугу дуу, өлөрүөхсүтү дуу тута кэлбит курдук батаһынан уонна үөрбэнэн сэбилэммит этилэр. Кинилэр үгүстэрэ архиерейдар уонна фарисейдар чаҕардара, оттон иилээччилэрэ-­саҕалааччылара үөрэнээччилэртэн биирдэстэрэ Иуда этэ.

— Эһиги кими көрдүүгүт? — ыйыппыта Иисус.

— Назареттан сылдьар Иисуһу, — ким эрэ хардарбыта.

— Ол Мин, — диэбитэ Иисус.

«Буккуур тахсыбат гына мин Үөрэтээччини эҕэрдэлиир бэлиэнэн сыллыам. Бу бэлиэнэн эһиги Кими тутуохтааххытын өйдүөххүт», — диэн Иуда аҕалбыт дьонун кытта эрдэттэн болдьоспуттар этэ.

Иуда Үөрэтээччитигэр чугаһаабытыгар Иисус оргууй эппитэ:

— Доҕоруом, Миигин сыллаан таҥнараҕын дуу?

Бу тыллар Иуда сүрэҕин тэһитэ кэйиэлээбиттэрэ да буоллар, кини Иисуһу сыллаабыта. Бу кэмҥэ архиерейдар чаҕардара инники түһэн Иисуһу тутан ылбыттара.

— Эһиги тоҕо Миигин манна түүн ортото тутаҕыт? Мин күн аайы храмҥа сылдьабын эбээт. Онно Миигин туппатаххыт, — диэбитэ Иисус уонна Кинини быанан баайалларыгар утарсыбатаҕа.

Үөрэтээччилэрин хайдах тутан илдьэллэрин көрөөт, үөрэнээччилэр кутталларыттан үрүө-тараа куоппуттара.

Өстөөхтөрө Иисуһу арыаллаан Иерусалимҥа илдьэ барбыттара, онно Кинини өлөрөр уураах кэтэһэрэ.