Гефсимания саадыгар

Иисус уон биир үөрэнээччитин кытта Иерусалим аттынан сүүрүгүрэр Кедрон үрүйэтин уҥуор тахсыбыта. Уон иккис үөрэнээччитэ Иуда кинилэр ортолоругар суох этэ. Хараҥа түүн кинилэр Елеон хайатыгар — Иисус Халлааннааҕы Аҕатыгар үгүстүк үҥэр сиригэр барбыттара.

Хайа тэллэҕэр олива мастардаах Гефсимания саада баара. Саадка тиийэн баран, Иисус үөрэнээччилэригэр эппитэ:

— Манна кэтэһиҥ, оттон Мин баран үҥүөм.

Оттон Петры, Иаковы уонна Иоанны Бэйэтин кытта илдьэ барбыта.

Иисуска ити мүнүүтэлэргэ олус ыарахан этэ, Кини курутуйара уонна санааргыыра. Кинини туох кэтэһэрин билэрэ. Бар дьон аньыыта-­харата барыта ыар таһаҕас буолан киниэхэ сүктэриллиэхтээҕэ, Кини ыар эрэйи-муҥу уонна кириэскэ тиириллэн өлүүнү көрсө баран иһэрэ. Иисус эт-сиин эрэйин эрэ буолбакка, туох ханнык иннинэ киһи сатаан уйбат дууһа моруутун тулуйуохтааҕа. Аньыыны-­хараны билбэтэх бэйэтэ, Кини киһи аймах бары аньыытын Бэйэтигэр ылыныахтаах этэ.

Иисус ис-иһиттэн муунтуйан, мунчааран тапталлаах үөрэнээччилэригэр эппитэ:

— Дууһам өлөр кутурҕаҥҥа ылларда, эһиги утуйбакка манна Миигин кытта бииргэ буолуҥ!

Иисус, ханнык баҕар киһи курдук, доҕотторо Киниэхэ өйөбүл буолуохтарын баҕарара, бииргэ үҥэргэ ыҥырара. Кинилэртэн аҕыйах хаамыы тэйбитэ, тобуктаабыта уонна умса түһэн, үҥпүтэ:

— Аҕаа! Кыаллар буоллаҕына, бу эрэй-буруй иһитэ Миигин тумнан аастын дуу. Ол эрээри Мин баҕабынан буолбатын, Эн көҥүлгүнэн буоллун.

Ханнык баҕарар киһи курдук, Иисус көрсүөхтээх эрэйиттэн-­муҥуттан куотунуон баҕарара, ол гынан баран Кини Аҕатыгар истигэн Уол буолан эппитэ:

— Мин көҥүлүм буолбакка, Эн көҥүлүҥ буоллун.

Иисус ис-иһиттэн муунтуйан, ордук кыһаллан үҥпүтэ. Кини көлөһүнэ тохтор хаан курдук сиргэ түспүтэ. Халлаантан Аанньал түһэн Кинини бөҕөргөппүтэ.

Иисус үҥэн бүтэн, бииргэ үҥэллэригэр көрдөспүт үс үөрэнээччитигэр тиийбитэ. Дьоно үҥпэккэ утуйа сытар этилэр. Кинилэри уһугуннаран баран Петрга туһаайан эппитэ:

— Симон! Эн утуйа сытаҕын дуу? Биир чаас Миигин кытта буоларыҥ эйиэхэ кыаллыбата дуо?

Иисус хаһан эрэ Симон Кинини кытта бииргэ өлөрүн уонна Киниттэн хаһан да аккаастамматын эрэннэрбитин санатаары итини эппитэ. Иисус өссө иккитэ үөрэнээччилэриттэн өйөбүл буолан үҥэллэригэр көрдөспүтэ даҕаны, иккитэ төннөн кэлэригэр дьоно утуйа сыталлар этэ. Үсүһүн кэлэн баран Кини эппитэ:

— Эһиги кэм да утуйа сытаҕыт дуо? Мин кэмим-­кэрдиим кэллэ: Киһи Уола аньыылаахтар илиилэригэр бэриллэн эрэр. Туруҥ, бардыбыт: көрүҥ, Миигин таҥнарааччы чугаһаата.

Ыйытыктар:

1) Иисус киэһээҥҥи аһылык кэнниттэн ханна барбытый?

2) Гефсимания саадыгар Иисус тугу гыммытый? Аҕатыттан тугу көрдөспүтүй?

3) Иисус үөрэнээччилэриттэн туох диэн көрдөспүтүй?