Бүтэһик Паасха
Библия, Иоанн Евангелиятын 13 түһүмэҕин 1-32 хоһоонноро
Паасха Израиль норуотугар улахан суолталаах бырааһынньык этэ. Иисус бу сырыыга бырааһынньыгы үөрэнээччилэрин кытта бэлиэтиэн баҕарбыта.
— Иерусалимҥа тиийдэххитинэ купсууҥҥа уу илдьэн иһэр киһини утары көрсүөххүт, — Петрга уонна Иоаҥҥа эппитэ. — Кинини дьиэтигэр диэри батыһаарыҥ уонна Паасханы ханна бэлиэтиэххэ сөбүн ыйытаарыҥ. Кини эһиэхэ улахан хоһу көрдөрүөҕэ, онно барытын бэлэмнээриҥ.
Үөрэнээччилэр барытын Иисус хайдах эппитин курдук оҥорбуттара.
Киэһэ кинилэр Иерусалимҥа баар дьиэ киэҥ хоһугар мустубуттара. Онно Иисус тугу гыммыта бырааһынньык сиэригэр букатын сөп түбэспэт этэ. Кини суунар тааһы ылбыта, онно уу куппута уонна сөһүргэстээн олорон, үөрэнээччилэриттэн биирдэстэрин атаҕын сууйан барбыта. Сууйан бүтэн баран, Кини иккис үөрэнээччитигэр көспүтэ, онтон үсүһүгэр…
Үөрэнээччилэр дьиктиргээн харахтара кэҥээтэр кэҥээн испитэ. Тоҕо маннык гынара эбитэ буолла? Биллиилээх дьон дьиэтигэр ыалдьыттар атахтарын сууйар чаҕардар баар буолаллара. Оттон Иисус кинилэр чаҕардара буолбатах эбээт! Кини — Үөрэтээччи, Таҥара Уола! Уонна чаҕар үлэтин толорор!
Петр уочарата кэлбитигэр утарбыта:
— Айыы Тойон, Эн хаһан даҕаны мин атахпын сууйуоҥ суоҕа!
Иисус кинини көрөн баран эппитэ:
— Өскөтүн атаххын сууйтарбат буоллаххына, эн Миэхэ туох да сыһыана суох буолаҕын!
Петр толкуйдаабыта. Бу кини атаҕын сууйуу эрэ туһунан буолбатах этэ, Иисус манна улахан өйдөбүлү уурара.
Үөрэнээччилэрин атахтарын сууйан баран, Иисус кинилэри кытта эмиэ өттүгэстээн сыппыта.
— Мин тугу гыммыппын өйдөөтүгүт дуо? — ыйыппыта Кини.
Үөрэнээччилэр саҥата суох олорбуттара, тоҕо диэтэр, тугу да өйдөөбөтөхтөрө.
— Мин эһиэхэ холобур көрдөрдүм, — быһаарбыта Иисус, — эһиги эмиэ итинник гыныах тустааххыт.
«Ити курдук дуо? Чаҕардарга кубулуйабыт? Иисус дьиҥэр биһигиттэн итинниги ирдиэн сатаммат эбээт!» — дии санаабыттара үөрэнээччилэрэ.
Иисус салҕаабыта:
— Эһиги Миигин Үөрэтээччи уонна Айыы Тойон диэн ааттыыгыт. Сөпкө этэҕит, ити кырдьык. Ол да буоллар Мин эһиги атаххытын сууйдум. Өскөтүн Мин итини оҥорбут буоллахпына, эһиги өссө ордук итини оҥоруохтааххыт.
Киэһээҥҥи аһылыгы саҕалыыр кэм буолбута. Үөрэнээччилэр аһыыр астарын бэлэмнээбиттэрэ уонна Иисус үҥэрин кэтэспиттэрэ. Кини үҥүөн иннинэ сотору кэминэн өлөрүн санатан үөрэнээччилэрин өссө биирдэ соһуппута. «Миигин күлүү-элэк оҥостуохтара, Миигин кырбыахтара, онтон өлөрүөхтэрэ. Ол гынан баран үһүс күммэр өлбүттэртэн тиллиэҕим, — бу тыллартан үөрэнээччилэр олус хомойбуттара. Оттон Иисус салҕаабыта, — Мин бу Паасханы, эрэйи-муҥу көрсө иликпинэ, эһигини кытта бииргэ бэлиэтиэхпин олус баҕарбытым. Тоҕо диэтэр, аныгы сырыыга бу бырааһынньыгы Мин атын дойдуга — Таҥара Саарыстыбатыгар көрсүөҕүм».
Ол кэнниттэн Иисус килиэби ылбыта, килиэп туһугар махтанан үҥпүтэ.
Онтон тоһутан үөрэнээччилэригэр түҥэппитэ.
— Бу Мин Этим-сииним, — диэбитэ Кини. — Бу килиэп тоһутуллубутун курдук, Мин Этим-сииним эһиги тускутугар эмиэ сэймэктэниэ. Миигин ахтан-санаан туран эһиги маннык гынар буолуҥ.
Аһылык кэнниттэн Иисус чааскыны ылан, онно виноград отонуттан оҥоһуллубут арыгыны кутан баран, эппитэ:
— Бу эһиги тускутугар тохтор Мин хааным буолар, Таҥара дьону кытта түһэрсибит саҥа кэс тыла.
Аттыгар олорор үөрэнээччитигэр чааскыны биэрбитэ, бары биирдии-биирдии ол чааскыттан испиттэрэ.
Киэһээҥҥи аһылык бүтэрэ чугаһаан эрэрэ. Бу Паасханы уруккуттан олох уратытык бэлиэтээбиттэрэ. Үөрэнээччилэр манна туох буола турарын быстар быһаҕаһын эрэ өйдөөбүттэрэ. Ол эрээри сотору Айыы Тойон Паасха бүтэһик аһылыгар эппит тылларын суолтатын кинилэр өйдүөхтэрэ.
Ыйытыктар:
1) Иерусалимҥа Паасха аһылыгын ким бэлэмниэхтээх этэй?
2) Иисус тоҕо үөрэнээччилэрин атахтарын сууйбутуй?
3) Иисус бу холобурунан үөрэнээччилэрин уонна Кинини батыһааччылары барыларын туохха үөрэтиэн баҕарбытый?
4) Айыы Тойон үөрэнээччилэригэр ханнык кэс тылы олохтообутуй?