Вифанияҕа Иисуһу арыынан аҕааһын

Паасха буолуо алта күн иннинэ Иисус үөрэнээччилэрин кытта Вифанияҕа кэлбитэ. Кини уруккутун курдук Марфа, Мария уонна Лазарь дьиэлэригэр тохтообута. Сарсыҥҥы күнүгэр киэһэ кинилэр бары урут Иисус араҥ ыарыыттан эмтээбит Симоныгар ыалдьыттыы тиийбиттэрэ.

Марфа ас тардан түбүгүрэ сылдьыбыта. Оттон Мария туран, күндү мир арыылаах алавастр иһитин ылан, Иисуска тиийбитэ. Кини сэрэнэн кэбирэх иһит бэчээттэниллибит куолайын туура охсон баран, Иисус төбөтүгэр уонна атаҕар арыыны куппута. Ол кэннэ уһун баттаҕын сүөрэн Иисус атаҕын соппута. Дьиэ иһин бүтүннүү сыаналаах арыы сыта тунуйбута.

Дьиэҕэ баар дьонтон сорохторо Марияҕа кыыһырбыттара. Кинилэр сыаналаах мир арыыны харыһыйбыттара. Христоһу кэнники таҥнарбыт Иуда Искариот эппитэ:

– Бу мир арыыны үс сүүс үрүҥ көмүс манньыакка атыылаан баран, харчытын дьадаҥыларга түҥэтэр тоҕо сатамматый?

Дьадаҥыларга кыһаллан буолбакка, уоруйах буолан кини итинник эппитэ. Иуда элбэх киһи Иисуска сиэртибэлээн биэрэр харчыларын угар дьааһыктарын илдьэ сылдьара уонна онтон үгүстүк бэйэтигэр ылара.

Иисус үөрэнээччилэрэ айманалларын тохтотон, кытаанахтык эппитэ:

– Кини Миэхэ үтүөнү оҥордо. Дьадаҥылар эһиги аттыгытыгар өрүү баар буолуохтара, оттон Мин өрүү эһигини кытта бииргэ буолуом суоҕа! Бу арыыны эппэр кутан, Миигин эрдэттэн харалларга бэлэмнээтэ! Аан дойдуга Евангелия иһитиннэриллэрин тухары кинини уонна Миэхэ оҥорбут үтүөтүн өрүү өйдүү-саныы сылдьыахтара!