Авраам уонна Лот

Кэм-кэрдии ааспытын кэннэ Авраам уонна Лот олус байбыттара. Кинилэргэ улахан да, кыра да сүөһү үөрэ үксээбитэ, үрүҥ уонна кыһыл көмүс элбээбитэ. Ол эрээри сотору кэминэн кыһалҕа кыһарыйбыта. Сүөһүлэрэ аһара элбээн мэччийэр сирдэрэ кэмчи буолбута, үлэһиттэрэ бэйэ-бэйэлэрин кытта сир былдьаһаллара элбээн барбыта.

Авраам Лотка эппитэ:

— Маныыһыттарбыт эбэтэр биһиги бэйэбит иирсэрбит сатаммат — аймахтыы буоллахпыт дии. Онон эн биһикки арахсыах! Өскөтүн эн хаҥас диэки барар буоллаххына, мин уҥа өттүгэр барыаҕым. Оттон уҥа өттүн эн талар буоллаххына, мин хаҥас өттүгэр барыаҕым.

Ити курдук Авраам аймаҕар хайа сиргэ олохсуйарын талларбыта. Лот анааран көрдөҕүнэ, Иордан өрүһүн хочото олус үүнүүлээх, Библияҕа этиллэринии Едем саадыныы быйаҥнаах этэ. Ол иһин Лот бу кэрэ көстүүлээх сири талбыта. Кини бэйэтин эрэ туһунан толкуйдуура. Бу сири кэнэҕэс туох күүтэрин, манна баар Содом уонна Гоморра куораттар содур быһыылаах олохтоохторун кэлин Таҥара сири кытта тэҥниэҕин Лот билбэт этэ. Лот Айыы Тойону ытыктыыр да буоллар, Содом куорат мөкү быһыылаах олохтоохторун быыһыгар олохсуйарын сирбэтэҕэ.

Кэм ааһан испитэ. Биир күн Айыы Тойон Авраамҥа Бэйэтин быһаарыныытын иһитиннэрбитэ:

— Содомнаах Гоморра олохтоохторо аньыылара-­харалара халыҥаата. Бу куораттарга тиийэн, кинилэргэ бэлэмнээбит сэмэм сөп эбит дуу, суох дуу диэн көрүөм.

Айыы Тойон икки аанньалын сорудахха ыыппыта. Оттон Авраам Таҥараттан ыйыппыта:

— Арай бу куораттарга биэс уон көнө, кырдьыксыт киһи олорор буоллун? Ама Эн бу куораттары кинилэр тустарыгар аһыныаҥ суоҕа этэ дуо?

— Өскөтүн онно биэс уон көнө киһи баар буоллаҕына, Мин ол дьон туһугар буруйбун-­сэмэбин ыытыам суоҕа, — диэн Таҥара эрэннэрбитэ.

Авраам хат-хат ыйытара уонна хас сырыы аайы көнө дьон ахсаанын аҕыйатан иһэрэ: 45, 30, 20, ити курдук 10‑ҥа диэри. Айыы Тойон хоруйа наар биир этэ — кинилэр тустарыгар аһыныам диэн.

Айыы Тойон сорудаҕар барбыт икки аанньал киэһэ Содомҥа тиийбиттэригэр Лот куорат аанын айаҕар олороро. Манна куорат ытык дьоно мусталлара. Айанньыттары көрөөт, Лот туран сиргэ диэри сүгүрүйэн баран дьиэтигэр хонноро ыҥырбыта.

— Суох, биһиги таһырдьа хонуохпут, — диэн хоруйдаабыттара аанньаллар.

Содом олохтоохторо кэлии дьоҥҥо кырыктаах сыһыаннарын Лот билэрэ, ол иһин дьаныһан туран айанньыттары дьиэтигэр аҕалбыта. Саҥа чэйдээн эрдэхтэринэ, таһырдьа тыас-уус, айдаан-­куйдаан буолбута. Ити куорат олохтоохторо Лоттан айанньыттары кинилэргэ биэрэрин ирдии кэлбиттэр этэ. Лот ыалдьыттарын көмүскэһэрин билэн, аны киниэхэ сааммыттара. Онуоха аанньаллар ити дьону хараҕа суох оҥортообуттара уонна Лотка эппиттэрэ:

— Түргэнник дьиэ кэргэҥҥин хомуйан куораттан тахсыҥ. Олохтоохтор аньыыларын-­хараларын туһунан Айыы Тойоҥҥо тиийбит, биһиги бу куораты имири эһиэхпит.

Хомойуох иһин, Лот кыргыттарын ойох ылыахтаах уолаттар киниэхэ итэҕэйбэтэхтэрэ, дьээбэлэнэр дии санаабыттара. Лот бэйэтэ эмиэ куотарга ыксаабатын иһин аанньаллар кини ойоҕун уонна кыргыттарын илиилэриттэн сиэтэн куораттан таһаарбыттара, тоҕо диэтэр, Айыы Тойон кинилэри аһыммыт этэ. Кини: «Кэннигитин хайыспакка куотуҥ», — диэбитэ. Ол эрээри Лот ойоҕо сэрэтиини истибэтэҕэ, кэннин хайыһан көрбүтэ — тута туус баҕанаҕа кубулуйбута. Атыттар салгыы куотан испиттэрэ…

Айыы Тойон Содомҥа уонна Гоморраҕа халлаантан сиэрэлээх уоту саккыраппыта. Ити куораттар, тулалыыр сирдэр, ону таһынан Иордан хочотугар баар тыынар тыыннаах барыта имири эстибиттэрэ. Билигин онно хаһан эрэ илгэ быйаҥ хочолоох, кэрэ көстүүлээх сир оннугар Өлбүт муора сытар, Библияҕа ити Туустаах муора диэн ааттанар.