Иисус Иерусалимҥа киириитэ

Пасха чугаһаабыта. Иисус үөрэнээччилэрин кытта Вифанияттан Иерусалимҥа айаннаабыттара. Бэрт элбэх киһи кинилэри арыаллыыра. Иеруслаимҥа тиийдэҕинэ Кинини улуу эрэйдэниилэр күүтэллэрин Иисус хаста да хатылаан эппитэ. Ол эрээри саҕаланыытыгар барыта өрөгөйдөөх хаамыыны санатара. Үөрбүт-­көппүт дьон Айыы Тойону көрсүбүтэ, пальма лабааларынан, кыайыы уонна босхолонуу бэлиэтинэн, далбаатыыллара. Ол аата Иерусалим олохтоохторо өрдөөҕү ыра санаабытын толоруо диэн Иисуска эрэнэллэрэ. Пророктар нөҥүө Таҥара эрэннэрбит Иудея Ыраахтааҕыта, Мессия кинилэри Рим хабалатыттан босхолуохтааҕа! Назареттан сылдьар Иисус барыларыттан ордук Ыраахтааҕы оруолугар сөп түбэһэрэ!

Иисус дьон баҕа санаатын эрэ буолбакка, Суруйууларга Захария пророк нөҥүө Таҥара Кини туһунан эппитин билэр этэ: «Бу эн көрсүө-­сэмэй Ыраахтааҕыҥ өсүөлгэ олорон кэлэн иһэр…» Халлааннааҕы Аҕатын тылын толорор баҕаттан үөрэнээччилэригэр чугас сытар сэлиэнньэттэн Киниэхэ өсүөл оҕотун аҕалалларыгар эппитэ. Үөрэнээччилэрэ Иисус соругун толорбуттара. Эдэр өсүөл үрдүгэр бэйэлэрин таҥастарын уурбуттара, ол үрдүгэр Айыы Тойон олорбута. Кинини батыһар дьон үөрэн туран хаһыытыыллара:

— Осанна! Айыы Тойон аатыгар Кэлэн Иһээччи алгыстаах! Осанна, мэҥэ халлааҥҥа!

«Осанна» диэн былыргы еврей тыла «Айыы Тойон, биһигини алҕаа уонна быыһаа!» диэн суолталааҕа.

Сорохтор «Аллилуйя!», ол аата «Таҥараны айхаллааҥ!» диэн эмиэ хаһыытыыллара.

Сыыйа-баайа көрсөөччүлэри долгутуулаах өрөгөй эмиэ хам кууспута. Бары Таҥараны айхаллыыллара:

— Иисус, Эн биһиэхэ Таҥара көмөҕө ыыппыт киһитэ буолаҕын!

Дьон Иисуһу көрсөөрү пальма лабааларын быһаллара уонна өссө туран хаһыытыыллара:

— Айхаллыыбыт Эйигин! Эн биһиэхэ Таҥара ыыппыт киһитэ буолаҕын! Эн биһиги Ыраахтааҕыбыт буолаҕын! Эн биһиэхэ эйэни аҕалан иһэҕин!

Ыраахтааҕы иннигэр ууруллар уһун көбүөр оннугар дьон таҥастарын устан быыллаах сиргэ тэлгииллэрэ. Ити курдук кинилэр Иисус эрэннэриллибит Быыһааччы буоларын көрдөрүөхтэрин баҕарбыттара. Кини Ыраахтааҕы буолуохтаах! Өрөгөйдүүр дьоҥҥо ааһан иһэр дьонтон кыттыһааччы элбээбитэ. Хайа да диэки көр, барытыгар мичээр, үөрүү-­көтүү, өрөгөй. Ол гынан баран бу үөрүүгэ бары кыттыспатахтара. Туораттан көрөн турбут хараастыбыт фарисейдар Иисуска кэлэн эппиттэрэ:

— Маны тохтот! Өскөтүн ити Эйигин Ыраахтааҕы дииллэрин Рим дьоно иһиттэхтэринэ, Эйиэхэ куһаҕан буолуо. Кинилэр тугу хаһыытыылларын да билбэттэр. Саҥаралларын буой!

Иисус норуокка кинилэрдээҕэр ордук сабыдыаллаах уонна биллэр буолбутун иһин фарисейдар ордугургууллара. Кинилэр иудейдарга ааппытын-­суолбутун уонна сабыдыалбытын сүтэриэхпит диэн куттаналлара.

— Суох, — диэбитэ Иисус, — өскөтүн кинилэр уруйдуулларын тохтоттохторуна, таастар хаһыытаһыахтара. Таҥараны айхаллаатыннар!

Дьиҥэ Айыы Тойон Таҥараны бүгүн айхаллыыр дьонтон үгүстэрэ аҕыйах хонугунан Кинини таҥнарыахтарын уонна хаалларыахтарын билэрэ. Кинилэр тапталлара сүр түргэнник абааһы көрүүгэ кубулуйуоҕа уонна Кинини кириэскэ тиириэхтэрэ.

Ыйытыктар:

1) Дьон Иисуһу батыһан Иерусалимҥа айаннаан иһэн Киниттэн тугу кэтэһэрий?

2) Иисус хайдах Иерусалимҥа киирбитий?

3) Иисуска туох ордук суолталаах эбитий: ыраахтааҕы буолар дуу, эбэтэр Аҕатын көҥүлүн толорор дуу (кириэскэ тиириллэн эрэйдэнэр)? Тоҕо?