Закхейдыын көрсүһүү

Иерихоҥҥа Закхей диэн түһээн хомуйааччылар тойонноро олорбута.

Кини баай уонна биллэр киһи этэ. Закхей үлэлиир сирэ Иерихоҥҥа киирэр аантан чугас баара. Куоракка киирэр баҕалаах атыыһыттар бу аанынан ааһаллара.

— Тохтооҥ! — диэн кинилэри Закхей тохтоторо. — Ким даҕаны түһээн төлөөбөккө ааһар бырааба суох. Харчыгытын хостооҥ — икки үрүҥ көмүс манньыаты — Рим былааһа түһэрбит түһээнэ оччо буолар.

Айанньыттар тиистэрин хабырына-­хабырына харчыларын хостуулларын көрөн Закхей иһигэр үөрэрэ. Тоҕо диэтэр, хас сырыы аайы кини баайа хаҥаан иһэрэ. Рим былааһыгар кини биир үрүҥ көмүс манньыаты биэрэрэ, оттон биирин бэйэтигэр хаалларара.

Үгүстүк күлэ-үөрэ да сырыттар, кини дьоло суоҕа. Тоҕо диэтэргин, кинини ким да таптаабат этэ. Үгүс дьон киниэхэ өстүйбүтэ. Биллэн турар, Закхей манна барытыгар бэйэтэ буруйдааҕын билэрэ. Кини сыыһа быһыыланара эбээт.

Биирдэ Закхей Иисус сотору Иерихоҥҥа кэлэрин туһунан дьон кэпсэтэрин истибитэ.

— Иисус?!

Закхей сэрэҕэдийбитэ.

«Иисус! Мин эмиэ Кинини көрүөхпүн баҕарабын, Кини биллэр киһи эбээт. Иисус дьону барытын таптыыр дииллэр, ол гынан баран миигин, биллэн турар, Кини таптаабат, — дии саныыра Закхей. — Миигин ким да таптаабат. Ол да буоллар, мин Кинини көрүөхпүн олус баҕарабын».

Закхей үлэһиттэрин дьаһайталаан баран, Иисус ааһыахтаах уулуссатыгар тахсыбыта. Онно Айыы Тойону көрүөн баҕалаах үгүс киһи хайыы-үйэ мустубут этэ! Закхей кыра уҥуохтааҕа, ол иһин мустубут дьон үрдүлэринэн Иисуһу көрөр кыаҕа суоҕа.

Закхей хайдах гыныай? Уулуссаҕа буола турары көрөр гына ханна эрэ үрдүккэ тахсарга быһаарыммыта. Кини чугас мас үүнэн турарын көрбүтэ. Бу үрдүгэр ыттарга санаммыта! Түһээн хомуйааччылар тойонноро маска ыттан эрэрин көрөн дьон күлбүтэ. Ол да буоллар Закхей кинилэргэ болҕомтотун уурбатаҕа, хайдах эмэ гынан Иисуһу көрдөҕүнэ сатанар.

Дьэ, Кини уон икки үөрэнээччитэ арыалдьыттаах кэлэн иһэрэ көстүбүтэ. Кэннилэриттэн өссө элбэх дьон батыһан иһэрэ. Закхей аллара, оруобуна кини аннынан ааһан иһэллэрин болҕомтолоохтук кэтээн көрө олорбута…

Суох! Иисус кинини ааһа барбатаҕа! Мас анныгар тохтообута, хантайан баран доргуччу:

— Закхей, мастан түһэ оҕус! Эйиэхэ ыалдьыттыы тиийиэхтээхпин! — диэбитэ.

«Хантан Кини миигин билэрий? — соһуйбута Закхей. — Уонна тоҕо Кини чуолаан мин дьиэбэр сылдьыан баҕарарый?»

Ол эрээри толкуйдуур бириэмэтэ суоҕа. Закхей көрүөх бэтэрээ өттүгэр мастан түспүтэ, Иисуһу үөрэнээччилэрин кытта дьиэтигэр илдьибитэ. Дьиэтигэр тиийэн, чаҕардарыгар саамай үчүгэй аһын астаан түргэнник остуолу тардалларыгар соруйбута. Закхей Иисустуун тус Бэйэтин кытта билсибититтэн олус үөрэрэ. Дьон кэпсиирэ чахчы эбит: Иисус кинини абааһы көрбөт этэ, Кини дьону барытын таптыыра, оннооҕор Закхей курдуктары. Оттон кини тугунан тыынарын тулалыыр дьон бары билэллэрэ.

Закхей сүрэҕэр улахан уларыйыылар буолбуттара. Иисустуун алтыһарыгар кини аньыытын-­харатын толору өйдөөбүтэ уонна олус кэмсиммитэ. Аһаан бүппүттэрин кэннэ Закхей Иисуска эрэннэрбитэ:

— Баайым аҥаарын дьадаҥыларга түҥэтиэм. Өскөтүн кимтэн эрэ биир манньыаты ордук ылбыт буоллахпына, киниэхэ түөрт төгүл элбэҕи төннөрүөм.

Закхей Иисус кини дьиэтигэр кэлбититтэн олус дьолломмута. Кинини кытта көрсүөҕүттэн олоҕо тосту уларыйбыта, саҥа олох саҕаламмыта.

Мантан ыла кини Таҥара эппитинэн эрэ олоруон баҕарара.

Иисуһу Закхей дьиэтигэр диэри арыаллаабыт дьон:

— Тоҕо Иисус итинник киһиэхэ тиийдэ? Ити албын-­көлдьүн киһини кытта биһиги кэпсэтиэхпитин да баҕарбаппыт, буолаары буолан биир остуолтан аһаабаппыт. Оттон Иисус киниэхэ ыалдьыттыы тиийэр, оттон биһиэхэ суох! — диэн абараллара.

Дьон Иисуһу мэлдьи өйдүүр буолбатах этэ.

Оттон Иисус Закхейга эппитэ:

— Бүгүн эн дьиэҕэр быыһабыл кэллэ! Билигин эн быыһанныҥ уонна мантан ыла Таҥара норуотугар киирсэҕин. Мин бу сиргэ эн курдук аньыылаах дьону булаары уонна быыһаары кэлбитим!