Лазары тилиннэрии

Вифанияҕа олорор Марфалаах Мария бырааттара Лазарь ыараханнык ыалдьыбыта. Эдьиийдэрэ кини өлүө диэн куттанан, Иисуска илдьит ыыппыттара:

— Айыы Тойон! Эн доҕоруҥ ыараханнык ыарыйда.

Айыы Тойон ким туһунан этэллэрин билэрэ да, долгуйбатаҕа. Кини эппитэ:

— Өлөргө буолбакка, Таҥараны албан аатырдар туһугар ыалдьыбыт!

Иисус ол сиргэ үөрэнээччилэрин кытта өссө икки күн буолбута, ол кэннэ эппитэ:

— Барыаҕыҥ! Лазарь билигин утуйа сытар, ол эрээри Мин кинини уһугуннарыам.

Үөрэнээччилэрэ саарбахтаабыттарыгар Иисус:

— Лазарь өлбүт! Мин онно суох буолан биэрбиппиттэн эһиги тускутугар үөрэбин, итинник эһиги түргэнник итэҕэйиэххит. Бара охсуоҕуҥ! — диэбитэ.

Иисус Вифанияҕа кэлбитигэр Лазарь хоруопка сыппыта хайыы-үйэ түөрт күн буолбут этэ. Сэлиэнньэҕэ киһи элбэҕэ, тоҕо диэтэр Марфаны уонна Марияны уоскутаары Иерусалимтан уонна ол эргинтэн үгүс иудей кэлбит этэ.

Марфа, Иисус сэлиэнньэҕэ чугаһаабытын истэн, Киниэхэ утары барбыта. Оттон Мария дьиэтигэр хаалбыта.

Марфа Иисуһу көрсөөт, эппитэ:

— Айыы Тойон! Өскөтүн Эн манна эбитиҥ буоллар, мин быраатым өлүө суоҕа этэ. Ол эрээри Эн Таҥараттан тугу көрдөспүккүн барытын Кини толорорун билэбин!

— Быраатыҥ тиллиэ! — диэбитэ Иисус.

— Кини суостаах дьүүл кэмигэр — бүтэһик кэмҥэ тиллэрин билэбин, — диэбитэ Марфа.

Иисус киниэхэ хардарбыта:

— Мин өлүүттэн Тилиннэрээччи уонна олоҕу Биэрээччи буолабын. Миигин итэҕэйэр киһи үйэ тухары өлүө суоҕа. Ону эн итэҕэйэҕиҥ дуо?

— Оннук, Айыы Тойон! Эн аан дойдуга кэлбит Христос, Таҥара Уола буоларгын итэҕэйэбин, — диэбитэ дьахтар уонна балтыгар Иисус кэлэн эйигин кэтэһэр диэн этээри тэбинэ турбута.

Мария эдьиийин тылларын истээт, Иисуска сүүрбүтэ. Кини Иисус иннигэр умса түһэн, иэйэн-­туойан ытаабыта. Иисус бары санаарҕаан туралларын көрөн долгуйбута, өлүк ханна баарын ыйыппыта. Киниэхэ ыйан биэрбиттэрэ. Иисус чугаһаат, ытаабыта уонна Лазарь баар хаспаҕын аанын бүөлүү сытар тааһы халбарыталларыгар соруйбута. Хас да киһи тааһы туора сыҕарыппыта. Айыы Тойон халлаан диэки көрөн баран эппитэ:

— Аҕаа! Миигин истибитиҥ иһин Эйиэхэ махтанабын.

Инньэ диэн баран доргуччу:

— Лазарь! Таҕыс! — диэбитэ.

Онуоха дьикти буолбута! Илиитэ-­атаҕа өлүнньүк таҥаһынан сууламмыт, оттон сирэйэ былаатынан саба баайыллыбыт киһи тахсан кэлбитэ. Иисус соруйбута:

— Сирэйин сабыытын сүөрүҥ, дьиэтигэр бардын!

Бу улуу дьиктини көрбүт элбэх иудей Иисуһу Айыы Тойонунан билиммитэ.

Ыйытыктар:

1) Лазарь хайа эдьиийэ Иисуһу көрсөөрү утары барбытый? Кини туох диэбитий?

2) Айыы Тойон «Мин өлүүттэн Тилиннэрээччи уонна олоҕу Биэрээччи буолабын» диэн тугу эппитий?

3) Дьикти хайдах буолбутуй?