Иисус оҕолору алгыыр

Иисус үгүстэ Таҥара уонна Таҥара Саарыстыбатын туһунан кэпсиирэ, сокуонньуттар оҕуруктаах ыйытыыларыгар тулуурдаахтык хоруйдуура, ааҕан сиппэт элбэх дьону үтүөрдэрэ. Бу күн, куруутун буоларын курдук, Кини тула олус элбэх дьон тоҕуоруспута. Эбиитин Иисуска оҕолоох төрөппүттэр бөлөхтөрө кэлбитэ.

— Тохтооҥ эрэ, — ким эрэ мустан турар дьон быыһыттан саҥарбыта, — ханна бара сатыыгытый?

— Иисуска, — диэбитэ биир дьахтар, — оҕолорбутун алҕатаары.

— Оҕолору дуо? — турар дьонтон биирдэстэрэ сэнээбиттии ыйыппыта.

— Иисус онтон атын дьыалата суоҕар дылы! Ама көрбөккүт дуо, манна ыарыһах дьон эмтэнээри кэтэһэн турарын? Ама истибэккит дуо, Кини

Таҥара Саарыстыбатын туһунан дьоһуннаах уонна суолталаах тыллары этэрин? Оттон эһиги буоллаҕына оҕолоргутун, оннооҕор тугу да кыайан өйдөөбөт саҥа төрөөбүттэри аҕалаҕыт!

— Оҕолор барытын өйдүүллэрэ наадата суох, ол гынан баран Таҥара тапталын кинилэр өйдүөхтэрин сөп. Ол иһин мин Иисустан көрдөһөөрү гынабын…

— Кини оҕолор тустара диэн күндү мүнүүтэлэрин халтай бараабат буоллаҕа!

— Баһаалыста, биһигини ыытыҥ!

Мөккүөр күүһүрэн барбыта. Онуоха Иисус эппитэ:

— Оҕолору Миэхэ аһарыҥ! Таҥара Саарыстыбатыгар кинилэр киирэллэр!

Үөрэнээччилэр соһуйбуттуу Иисуһу көрбүттэрэ. Төрөппүттэр үөрүүнэн оҕолорун илдьэ мустубут дьон быыһынан Иисуска киирбиттэрэ. Үөрэнээччилэрэ салгыы туох буоларын көрөөрү чугаһаабыттара.

Иисус дьоҥҥо эппитэ:

— Миигин итэҕэйиҥ, ким Таҥара Саарыстыбатын оҕо курдук ылыммат — онно киириэ суоҕа! Ким Таҥара тапталын оҕолуу итэҕэйбэт — Халлааннааҕы Саарыстыбаҕа тиксиэ суоҕа!

Ол кэннэ Иисус кыра оҕолору биир-биир көтөҕөн ылан, оттон улахан оҕолорго төбөлөрүгэр илиитин ууран алҕаабыта.