Содур суоллаах уол туһунан номох

Иисус фарисейдарга өссө биир номоҕу кэпсээбитэ. Биир киһи икки уоллааҕа. Кинилэр улаатаннар аҕаларыгар хаһаайыстыбаҕа көмөлөһөр дьон буолбуттара.

Улахан уол, куруук баҕаран туран да буолбатар, кырдьык көмөлөһөрө. Оттон кыра уол аҕата мэлдьи ыйыы-кэрдии биэрэриттэн хал буолбута. Кини туспа олорон бэйэм көҥүлбүнэн сылдьарым ордук буолуо дии санаабыта.

Биир үтүө күн кини аҕатыгар кэлэн эппитэ:

— Аҕаа, өлөххүнэ, эн уолуҥ буоларым быһыытынан, миэхэ ананар нэһилиэстибэни ылар бырааптаахпын. Ол гынан баран эн өлөргүн кэтэһиэхпин баҕарбаппын, дуоһуйа олоро охсуом этэ. Онон бэйэм өлүүбүн билигин ылыахпын баҕарабын. Эн хаһаайыстыбаҥ сороҕо өр дуу, өтөр дуу син биир миэнэ буолуоҕа.

Аҕата итини истэн олус хомойбута. Уол харчытын ыллаҕына төрөөбүт дьиэтиттэн барарын кини сэрэйэрэ. Ол да буоллар, уолун быһаарыныытын убаастаан, аҕата күһэйэн туран хаалларбатаҕа уонна анаммыт баайын биэрбитэ.

Сотору буолаат, кыра уол ыраах дойдуга аттаммыта. Онно тиийэн бэйэтигэр олус мааны дьиэ булуммута, ыарахан сыаналаах таҥастары атыыласпыта, дэлэй аска уонна көргө-­нарга элбэх харчыны ыһан‑тоҕон барбыта.

Сотору кэминэн тулалыыр дьон кини харчылааҕын уонна онтунан киһиргэнэрин бэлиэтии көрбүттэрэ. Атын дойду баай киһитэ ороскуоттарын төлүүрүн туһанан кини аттыгар мэлдьи тула көтө сылдьар уолаттар уонна кыргыттар көстүбүттэрэ. Эдэр уол чугас доҕоттору буллум дии саныыра. Ол эрээри кинилэр истиҥ доҕор буолбатахтар, кинилэргэ уол харчыта эрэ наада этэ.

Маннык чэпчэки, күүлэй аргыстаах олохтон эдэр уол олус дуоһуйбута. Элбэх сири кэрийэрэ, көр-нар дьиэлэригэр сылдьара, тугу баҕарбытын барытын ылынара.

Төрөөбүт дьиэтин туһунан кини санаан да көрбөт этэ.

Чэпчэки олох эдэр уолу үлүһүтэн, харчыта күнтэн күн аҕыйаатар аҕыйаан иһэрин кини аахайбата.

Биирдэ кини үгүс доҕотторун ыҥыран улахан бырааһынньык тэрийбитэ. Төлөһөөрү гыммыта, арай, харчыта тиийбэтин көрөн, өлөрдүү соһуйбута.

— Мин харчым бүппүт, — диэбитэ кини, — доҕотторум буоларгыт быһыытынан миэхэ көмөлөһүҥ!

— Доҕотторум даа? — утарсыбыттара кинилэр. — Ыалдьыттары ыҥыран баран кыайан төлөөбөт киһиэхэ биһиги доҕор буолбаппыт. Дьоллоох буол!

Итинник этэн баран кинилэр баран хаалбыттара.

Оттон эдэр уол көр-нар дьиэтин хаһаайыныгар бүтэһик харчытын биэрэригэр тиийбитэ, ол кэннэ хаһаайын кинини үүрэн кэбиспитэ.

Хайдах гыныай, эдэр уол кэриимнии барбыта. Манна дьэ кыһалҕа диэн тугун түргэнник өйдөөбүтэ. Бу кэмҥэ ол дойдуга улуу сут дьыл турбута. Ол иһин ким даҕаны киниэхэ кыратык да ас бэрсибэтэ, үлэ да көстүбэт этэ.

Уһуннук көрдөөн кини быыкаайык хамнаска сибиинньэ көрөөччү буолбута. Урут эдэр уол итинник үлэ туһунан кэпсэтэртэн да өһүргэниэ этэ, ол эрээри билигин оннук кэм буолбатах. Аччыктыырыттан иһэ курдьугунуура. Кини сибиинньэ да хоруудатыттан үөрүүнэн аһаан барыа этэ да, хаһаайын көҥүллээбэтэ. Дьэ, ити курдук кини киртийэн-­хахтыйан, таҥаһа барыта тырыта баран, аччыктаан, атаҕастанан сибиинньэлэр ортолоругар олорбута. Өр кэм устатыгар эдэр уол аан бастаан дьиэтин санаан кэлбитэ.

«Сыыһа да быһыыламмыт эбиппин, — дии саныыра кини. — Дьиэбэр хаалбытым эбитэ буоллар! Аҕам хайа баҕарар үлэһитэ миигиннээҕэр быдан ордуктук олорор».

«Тугу гынарбын биллим, — диэбитэ эмискэ кини. — Дьиэбэр төннөр эбиппин. Биллэн турар, аҕам уруккутун курдук сыһыаннаһыа суоҕа. Кини миэхэ аҕалыы сыһыанын, сэрэйдэххэ, букатыннаахтык сүтэрдэҕим буолуо. Ол эрээри, баҕар, кини миигин аһынан бэйэтигэр үлэһитинэн ылыа, хамнас төлүө».

Дьиэлиир суола олус уһун курдук буолбута. Тиһэҕэр дьэ ыраахтан аҕатын дьиэтин көрбүтэ. Эдэр уол тохтообута. Суолун бүтэһигэр кини сэниэтэ эстибитэ. Аны билигин аҕатын кытта дьэ хайа сирэйинэн көрсөр?!

Арай киниэхэ утары сүүрэн иһэр киһини көрбүтэ. Хараҕын симириҥнэтэн ырааҕы көрбүтэ — аҕата эбит!

Саастаах киһи илиитинэн далбаатана-­далбаатана, үөрүүтүттэн тугу эрэ хаһыытыыра. Ама аҕата кини төннүбүтүттэн үөрэрэ буолуо дуо? Уол сатаан итэҕэйбэтэҕэ.

Ама аҕата киниэхэ кыыһырбата, ама кини уруккутун курдук кинини таптыыра буолуо дуо?!

Аҕата чугаһаабытыгар уол хараҕыттан уу-хаар баспыта уонна аргыый сибигинэйэн эппитэ:

— Аҕаа, эн иннигэр мин олус улахан буруйдаахпын. Аньыым-­харам элбэҕэ бэрт, онон эн уолуҥ аатын сүгэр кыаҕым суох. Бырастыы гын, миигин. Эйиэхэ чаҕар буоламмын дьиэҕэр хааларбын көҥүллээ. Эн иннигэр буруйбун саатар хайдах эмэ сымнатар туһугар мин саамай ыарахан үлэни оҥорорго бэлэммин.

Аҕата уолун күүскэ кууһан ылан сыллаабыта. Ол кэннэ иккиэн дьиэлэрин диэки барбыттара. Тиийэн баран аҕата чаҕардарын соруйбута:

— Мин уолбар саамай бастыҥ таҥаһы аҕалыҥ! Уонна уотуллубут тиҥэһэни өлөрүҥ! Биһиэхэ бырааһынньыктыырга төрүөт баар! Мин уолум өлөн баран тилиннэ, сүтэн баран көһүннэ!

Ыйытыктар:

1) Иисус фарисейдарга туох туһунан кэпсээбитий?

2) Бу номох киһини туохха үөрэтэрий?

3) Бу номоххо аҕа уонна уол кимнээҕи санаталларый?