Иисус Вифанияҕа

Иисус Иерусалимҥа кэллэҕинэ куораттан аҕыйах килэмиэтир тэйиччи сытар Вифания диэн дэриэбинэҕэ эмиэ үгүстүк сылдьара. Онно Кини Мария, Марфа уонна кинилэр бырааттара Лазарь диэн батыһааччыларын уонна доҕотторун дьиэлэригэр тохтуура.

Биир кэлиитигэр Мария Иисус этэрин истэ аттыгар олорбута, оттон Марфа остуол тардар түбүгэр түспүтэ. Сотору буолаат, Марфа Иисуска кэлэн сөбүлээбэтэх куолаһынан эппитэ:

— Айыы Тойон, Эн санааҕар балтым дьиэ түбүгүн барытын миэхэ соҕотохтуу сэлээннээбитэ үчүгэй дуо? Миэхэ көмөлөһөрүн курдук гына киниэхэ эт эрэ!

— Марфа! Марфа! Эн элбэххэ да кыһаллаҕын уонна түбүгүрэҕин, оттон, дьиҥэр, биир эрэ наада. Мария суолталааҕы талла, онтуката киниттэн аҕыйыа суоҕа, — диэн Иисус сымнаҕастык сэмэлээбитэ.

Улуу Үөрэтээччи этиитэ туох суолталааҕый? Кини Марфаҕа уонна атыттарга дьиҥ суолталаахха сүрүн болҕомтону уурар сөбүн өйдөтөн эппитэ. Духуобунай ас көннөрү астааҕар улахан суолталааҕын Марфа, Мария курдук, өйдүөхтээх этэ. Сүрүн суолталааҕы — Иисус Христоска итэҕэли — кимтэн да былдьаан ылбаккын, оттон сирдээҕи олох хаһан эмэ син биир түмүктэнэр. Биллэн турар, ол аата сирдээҕи олоххо олох кыһанымаҥ диэн буолбатах. Хас биирдии киһи бэйэтэ сыаллаах-­соруктаах! Ол гынан баран сирдээҕи олох кыһалҕалара киһи духуобунай олоҕун баһыйыа суохтаахтар. Оттон Марфаҕа бу түгэҥҥэ мааны остуола Быыһааччы тылларынааҕар ордук суолталаах этэ.

Ыйытыктар:

1) Иисус Иерусалимҥа кэллэҕинэ үгүстүк ханна

тохтуур эбитий?

2) Марфа ас бэлэмнииригэр тугу умнубутуй?

3) Тоҕо Иисус Марияны Марфаҕа көмөлөһүннэрэ ыыппатаҕый?