Таҥара эрэннэрбит сир

Ной уолаттара элбэх оҕоломмуттара. Кинилэртэн эмиэ элбэх ыччат төрөөн-­үөскээн сир-дойду үрдүнэн тарҕаммыта. Бу хайдах дьон этилэрий? Үгүстэрэ дьиҥ Таҥараны умнубуттара, тоҕо диэтэр, кинилэр Айыы Тойону көрбөт этилэр. Дьон итэҕэйиэн баҕаран араас сымыйа таҥаралары өйдөрүгэр айаллара, бэйэлэригэр улахан уонна кыра эмэгэттэри таастан эбэтэр мастан оҥостоллоро. Ол оҥорбут эмэгэттэрин араас сиргэ туруораллара уонна кинилэргэ тобуктаан туран: «Бу биһиги таҥараларбыт; кинилэр биһигини айбыттара, кинилэр биһиэхэ аһыыр аспытын биэрэллэр», — диэн үҥэллэрэ-­сүктэллэрэ.

Сотору кэминэн дьон улахан аҥаара Таҥараҕа буолбакка, эмэгэттэргэ сүгүрүйэр буолбуттара. Үксүгэр санаатын таба таайаары, албыннаһан эмэгэттэрин үрүҥ эбэтэр кыһыл көмүстэн оҥороллоро.

Дьон Киниттэн тэйэн, эмэгэккэ сүгүрүйэр буолбуттарын Таҥара үөһэттэн көрөн уордайбыта. Ол гынан баран Кини дьону имири эспэтэҕэ, тоҕо диэтэр, биир үтүө күн сиргэ бар дьону аньыыттан босхолуу Быыһааччы кэлиэхтээҕэ.

Таҥара Бэйэтигэр ураты норуоту айарга санаммыта. Онно Авраам диэн ааттаах киһини талан ылбыта. Ол эбэтэр, Авраам удьуордарыттан сиргэ Быыһааччы кэлиэхтээҕэ.

Таҥара Авраамҥа эппитэ:

— Сиргиттэн-­уоккуттан, дьоҥҥуттан-­сэргэҕиттэн арахсан, төрөппүт аҕаҥ дьиэтин хаалларан, Мин ыйар сирбэр тиий. Мин эйигиттэн улуу норуоту үөскэтиэм уонна алгыспын биэрэн эн ааккын аатырдыам.

Авраам ойоҕунуун Сарралыын уһун, ыарахан айаҥҥа туруммуттара. Кинилэри кытта Авраам сиэн быраата Лот барсыбыта.

Айыы Тойон Авраамҥа Ханаан сиригэр барар суолу ыйан биэрбитэ. Киниэхэ өссө биирдэ Таҥара саҥата чуолкайдык иһиллибитэ:

— Бу сири Мин эн удьуордаргар биэриэҕим.

Авраам ону истэн соругун ситиһэн эрэриттэн олус үөрбүтэ: «Ханаан — бу мин тиийиэхтээх сирим эбит!» Авраам Айыы Тойоҥҥо бэлэх биэрээри сонно тута толук биэрэр сири оҥостубута.

Ол гынан баран Авраам Таҥара тоҕо кини удьуорун туһунан этэрин кыайан өйдөөбөтөҕө. Кини ойоҕунуун Сарралыын оҕолоро суох этилэр. Ол да буоллар, Авраам олоҕун Таҥараҕа салгыы эрэммитэ.

Айыы Тойон Авраамҥа хас да төгүл эппитэ: «Мин эйигин алҕыам уонна араҥаччылыы сылдьыам, ким да эйиэхэ куһаҕаны оҥоруо суоҕа». Таҥара Авраамтан астынара уонна Бэйэм доҕорум диэн ааттыыра.

Ыйытыктар:

1) Сир дьонун улахан аҥаара туохха сүгүрүйэр буолбутуй?

2) Таҥара кими Бэйэм доҕорум диэн ааттыырый?

3) Таҥара Авраамҥа тугу эрэннэрбитий?