Биэс тыһыынча киһини тоторуу

Бүтүн күнү быһа Иисус норуоту кытта кэпсэппитэ. Кини истээччилэрин аҥаардас эр дьоно биэс тыһыынча этэ, оттон дьахтар-оҕо ахсаана онтон аҕыйаҕа суоҕа. Иисус Таҥара тылын кэпсиирин таһынан, Киниэхэ кэлэр ыарыһахтары үтүөрдэрэ.

Күн киэһэриитэ үөрэнээччилэрэ Иисуска эппиттэрэ:

— Үөрэтээччи, дьон тугу эрэ аһыан наада.

Иисус мичээрдээбитэ уонна эппитэ:

— Аһатыҥ ээ, кинилэри!

— Бачча элбэх киһиэхэ хантан ас атыылаһабыт? Биһиэхэ биэс килиэп уонна икки балык эрэ баар, — диэбитэ Филипп. — Бу сир иччитэх. Ону таһынан биһиги харчыбыт да аҕыйах.

— Килиэби уонна балыгы Миэхэ аҕалыҥ, — диэбитэ Үөрэтээччи.

Иисус килиэби ылбыта, килиэп иһин Таҥараҕа махтаммыта уонна Киниттэн алгыс көрдөспүтэ. Ол кэннэ килиэби тоһуталаан, үөрэнээччилэрэ тутан турар тымтайдарыгар укпута. Ити курдук балыгы эмиэ үллэрбитэ.

Үөрэнээччилэрэ соһуйан харахтарын хастыбыттара. Дьэ дьикти! Килиэптээх уонна балыктаах биир тымтай — өссө өйдөнөр. Оттон билигин тымтайдар бүтүннүү толору астаахтар! Бөлөх-бөлөх буолан окко олорор дьоҥҥо килиэп уонна балык түҥэппиттэрэ, тымтайдарын аһа көҕүрээн да көрбөтөҕө. Барыларыгар ас тиксибитэ! Хас биирдии киһи тото-хана аһаабыта.

Бу Иисус диэн туох киһиний! Кини маннык дьиктилэри оҥороругар хантан күүс ыларый?

— Хас биирдии бөлөҕү кэрийэ сылдьан хаалбыт аһы хомуйталааҥ. Туох да быраҕыллыа суохтаах, — диэбитэ Иисус үөрэнээччилэригэр.

Ордубут аһы хомуйан толору тымтайдаах төннүбүттэрэ. Дьон тото-хана аһаабыта, ол да үрдүнэн ордубут ас бастаан баарынааҕар өссө элбэх этэ!

Дьон илэ хараҕынан көрбүт дьиктитин сөхпүтэ-­махтайбыта:

— Бу дьиҥ кырдьык сиргэ кэлиэхтээх Пророк эбит.

Хомойуох иһин, биэс тыһыынча киһи ортотугар Иисус тугу ситиһэ сатыырын кыайан өйдөөбөт дьон бааллара. Кинилэр: «Өскөтүн Иисус итинник чэпчэкитик аһы булар буоллаҕына, биһиги ас булунар туһугар үлэлиирбит наадата суох эбит. Кинини ыраахтааҕы оҥостуохха уонна Иисус биһиги бары кыһалҕаларбытыгар кыһалыннын», — дии саныыллара.

Иисус дьон баҕатын билэрэ, ол эрээри Кини манна сирдээҕи ыраахтааҕы буола кэлбэтэҕэ эбээт. Ол иһин Иисус бу сиртэн түргэн соҕустук тэскилээбитэ, соҕотоҕун үҥээри хайаҕа тахсыбыта.

Дьон дьиэлэригэр тарҕаспыта. Кинилэртэн сорохторо Иисуһу өйдөөбөтөхтөрө.

Ыйытыктар:

1) Норуот Иисуска туох сыаллаах кэлбитий?

2) Иисус модун кыаҕын хайдах көрдөрбүтүй?

3) Бу дьикти кэнниттэн норуот Иисуска сыһыаннаан туох былааннаммытый?