Байҕалга буурҕа
Библия, Лука Евангелиятын 8 түһүмэҕин 22-25 хоһоонноро
Биир киэһэ Иисус Геннисарет күөлүн кытылыгар мустубут норуоту үөрэтэн баран, үөрэнээччилэригэр эппитэ:
— Күөл уҥуор туоруохпут.
Үөрэнээччилэрэ оҥочолорун бэлэмнээн, Иисуһу кытта бииргэ айаҥҥа туруммуттара.
Иисус күн устата олус сылайбыт этэ, ол иһин оҥочо кэлин өттүгэр сытан утуйан хаалбыта. Эмискэ, Галилея байҕалыгар сотору-сотору буоларын курдук, добун тыал түспүтэ. Долгун сабыта охсуталаан, оҥочо тимириэх курдук буолбута. Үөрэнээччилэр куттал суоһаабытын өйдөөн олус ыксаабыттара, Иисуһу уһугуннарбыттара:
— Үөрэтээччи, биһиги өлөн эрэрбит Эйиэхэ синэ биир дуо?
Иисус турбута. Кини анысханнаах тыалы, уорастыйбыт долгуннар оҥочону быраҕаттыылларын көрөн уордайбыт айылҕаны буойбута:
— Уоскуй! Тохтоо!
Буурҕа сонно тута намыраан хаалбыта. Байҕал ньуура сиэркилэ курдук көнө буолбута.
Дьикти! Буурҕа итинник эмискэ хаһан да тохтуу илигэ, долгуннар да сыыйа-баайа уҕарыйааччылар. Оттон билигин чыпчылыйыах түгэҥҥэ тула уу чуумпу буолан хаалбыта! Үөрэнээччилэр манныгы өссө көрө иликтэрэ. Оттон Иисус кинилэртэн ыйыппыта:
— Тоҕо эһиги маннык куттас сүрэхтээххитий? Итэҕэлгит ханнаный, кэмчи итэҕэллээхтэр?
Куттаммыт уонна соһуйбут үөрэнээччилэр бэйэ-бэйэлэриттэн ыйыталаспыттара:
— Тыалы уонна байҕалы бас бэриннэрэр Кини Кимий?
Кинилэр итэҕэлинэн ылыммыттарыгар өйдөрө сатаан тиийбэтэх, чуолаан, кинилэр Үөрэтээччилэрэ — Таҥара Уола буоларыгар.
Ыйытыктар:
1) Иисус тоҕо буурҕа кэмигэр холкутук утуйбутуй? 2) Үөрэнээччилэрэ тоҕо наһаа куттаммыттарый? Кинилэр тугу умнубуттарый? 3) Иисус буурҕаны тохтоппутугар кинилэр хайаабыттарый?