Иаир кыыһын тилиннэрии

Иаир урут хаһан да маннык түргэнник сүүрбэтэҕэ. Кини синагога (иудейдар үҥэллэригэр мустар дьиэлэрэ) салайааччыларыттан биирдэстэрэ этэ. Маннык улахан дуоһунастаах киһи сүүрэрэ сатаммат. Оттон билигин кини кыыһа өлөр кутталга сытара. Кини уон икки саастааҕа. Иаир кыыһын олус таптыыра, ол барахсана күнтэн күн мөлтөөн иһэрэ. Бу кэмҥэ Иисус үөрэнээччилэрин кытта куоракка кэлбитэ, Иаир Киниттэн көмө көрдөһөргө быһаарыммыта. Иисуска тиийээт, кини тобуктуу түспүтэ уонна уйаннык көрдөспүтэ:

— Үөрэтээччи, мин кыыһым өлөн эрэр. Көрдөһөбүн, тиийэн кинини быыһаа! Көрдөһөбүн! Ыксаа, хойутаан хаалыаҥ!

— Барыахха, — диэбитэ Иисус. — Эн инникки бар, оттон Мин эйигин батыһыам.

Ол эрээри үмүөрүспүт дьон быыһынан барар чэпчэкитэ суох этэ, ол иһин кинилэр олус бытааннара. Эмискэ Иаир биир бэйэтин чаҕара утары ыксаан аҕай иһэрин көрбүтэ. Чаҕар эппитэ:

— Эн аны Үөрэтээччини түбүгүрдэрин наадата суох. Кыыһыҥ сибилигин аҕай быһынна.

Ону истээт, Иаир сүрэҕэ тохтуу сыспыта. Барыта бүттэ! Тапталлаах оҕото өллө! Түбүгүрүү барыта халтайга буолла. Иаир таалан турбута, сирэйэ өлбүттүү кубарыйан хаалбыта.

Иисус чаҕар тугу эппитин истибитэ. Кини Иаиры санныттан кууһан ылбыта уонна эппитэ:

— Куттаныма, эн кыыһыҥ быыһаныаҕа.

Синагога салайааччыта туохха итэҕэйиэн билбэтэҕэ. Дириҥ кутурҕаҥҥа ылларан, дьиэтин диэки үнүөхтээбитэ. Иисус кинини батыспыта.

Чугаһаабыттарыгар ытааһын-­соҥооһун уонна онолуйуу иһиллибитэ.

Иисус эппитэ:

— Ытаамаҥ! Кыыс өлбөтөх, кини утуйа сытар!

Итини истибит дьон Кинини күлүү гыммыта. Кинилэр оҕо өлбүтүн чопчу билэллэрэ. Хайдах Кини итинник түктэри тыллары саҥарарый! Иисус барыларын киэр ыыппыта уонна кыыс төрөппүттэрин, үөрэнээччилэрин — Петры, Иоанны уонна Иаковы — кытта кыыс сытар хоһугар киирбитэ. Иисус кини илиитин тутан баран:

— Кыысчаан, тур! — диэбитэ.

Сонно кыыс дириҥник тыыммыта, онтон өссө биирдэ уонна хараҕын аспыта. Кини сирэйэ уруккутун курдук сырдаабыта уонна туран кэлбитэ.

Төрөппүттэрэ көрбүттэрин итэҕэйбэтэхтэрэ. Кинилэр оҕолоро тыыннаах! Бу дьолу!

— Кыыһы аһатыҥ, күүстэ киллэриннин, — диэбитэ Иисус.

Онтон Кини турбута уонна кыыска өссө биирдэ мичээрдээн баран тахсар аан диэки барбыта. Сотору буолан баран үөрэнээччилэрэ дьэ өйдөнөн, дьиэ кэргэни дьоллоох түбүктэрин кытта хаалларан, сып-сап Үөрэтээччилэрин батыһан тахсыбыттара.