Огдообо дьахтар уолун тилиннэрии

Иисус Галилея Наин диэн атын куоратыгар барбыта, онно Кинини элбэх киһи арыаллаан испитэ. Куорат ааныгар чугаһаан баран өлбүтү таһааран иһэр дьону утары көрсүбүтэ. Өлбүт киһини илдьэ иһэр наһыылка кэнниттэн улахан кутурҕаҥҥа ылларбыт дьахтар иһэрэ. Кинини аһынан, элбэх куорат дьоно тэҥҥэ хаамсан иһэллэрэ. Бу дьахтар огдообо этэ, оттон өлбүт киһи — кини соҕотох уола.

Иисус ытаан-­соҥоон муҥнанар дьахтары олус аһыммыта:

— Ытаама! — диэбитэ Кини.

Арыаллааччылар тохтообуттара, оттон Иисус наһыылканы кэлэн таарыйбыта уонна өлбүккэ эппитэ:

— Эдэр уол! Эйиэхэ этэбин, тур!

Эдэр уол тиллэн өндөйбүтэ уонна кэпсэтэн барбыта. Дьэ, дьикти! Иисус уолу ийэтигэр төннөрбүтэ. Маны көрбүт дьон бары кутталларыттан чочумча иһийэн турбуттара, ол кэннэ бэйэ-бэйэлэрин быһа түһэ-түһэ айхаллаан барбыттара:

— Биһиэхэ улуу Пророк кэлбит! Таҥара Бэйэтин норуотун санаабыт!

Дьон Израиль Таҥаратын алҕаабыта уонна айхаллаабыта. Наиҥҥа буолбут дьикти туһунан сурах бүтүн Иудея устун түргэнник тарҕаммыта.