Дьахтары үтүөрдүү
Библия, Лука Евангелиятын 8 түһүмэҕин 42-48 хоһоонноро
Иисус оҥочонон төттөрү Капернаумҥа туораабытыгар, Кинини онно киһи бөҕө тоҕуоруһан, кэтэһэн тураллара.
Куорат кыараҕас уулуссаларынан бары Иисуһу батыспыттара. Кини тула дэлби үтүрүһэннэр, Иисус хаамарыгар ыарахан этэ.
Эмискэ Иисус тохтуу түспүтэ уонна эргиллэн ыйыппыта:
— Ким Миигин таарыйда?
Киниттэн күүс тахсыбытын Иисус билбитэ. Онуоха үөрэнээччилэрэ соһуйбуттара:
— Үөрэтээччи! Эйигин тула норуот үтүрүйсэ иһэрин көрөҕүҥ дии. Оттон Эн ким Миигин таарыйда диигин.
Иисус кинилэргэ хардарбатаҕа, таарыйбыты көрдөөн дьону эргиччи көрбүтэ.
Батыһааччылар ортолоругар ыарыһах дьахтар баара. Кини уон икки сыл устата арааһынай эмчиттэргэ эмтэнэ сатаабыта, баайын-дуолун барытын бараабыта. Ол да үрдүнэн киниэхэ туох да көмөлөспөтөҕө. Онтон кини Иисус дьикти күүһүн истибитэ уонна Киниэхэ эмтэнээри кэлбитэ. Иисус көрбөтүгэр кэнниттэн чугаһаабыта: «Өскөтүн Кини таҥаһын кытыытын таарыйдахпына — үтүөрүөм!», — дии саныыра. Дьахтар Иисус кинини үтүөрдэр кыаҕыгар бүк эрэнэрэ! Улуу Үөрэтээччи таҥаһын таарыйаат, үтүөрбүтүн сэрэйбитэ.
Иисус, биллэн турар, ким үтүөрбүтүн билэрэ. Ол эрээри дьахтар бэйэтэ Киниэхэ чугаһыырын кэтэспитэ. Дьахтар кэлбитэ, кутталыттан салыбыраабытынан Иисус иннигэр умса түспүтэ уонна туох буолбутун барытын кэпсээбитэ. Иисус тапталынан хардарбыта:
— Кыыһым, эйигин итэҕэлиҥ быыһаата. Эйэни кытта бар!
Ыйытыктар:
1) Иисус үөрэнээччилэрин кытта ханнык
куоракка кэлбитий?
2) Уон икки сыл устата ыалдьыбыт дьахтар тугу гыммытый?
3) Дьахтары туох үтүөрдүбүтүй?