Босхоҥ киһини үтүөрдүү

— Эн сонуну истибитиҥ дуо? — диэн биир эр киһи доҕоруттан ыйыппыта.

— Иисус биһиги сэлиэнньэбитигэр баар! Ыарыһахтары үтүөрдэр Киһи!

— Эн биһиги доҕорбутун санаатыҥ дуо? Кини кыайан хаамар кыаҕа суох эбээт. Хайдах Иисуска тиийиэй?

— Илдьэн биэриэххэ! — диэбитэ эр киһи, уонна уһаппаккалар өссө икки билэр киһилэрин илдьэ босхоҥ доҕордоругар кэлбиттэрэ. Кинилэр наһыылка курдугу оҥорон, ыарыһаҕы онно сытыараат, Иисус тохтообут дьиэтигэр ыксаабыттара. Абаккалаах да буолар эбит! Тиийбиттэрэ — дьиэ иннигэр киһи бөҕө мустубут. Элбэх киһи Иисуһу көрүөн, истиэн баҕарар эбит. Босхоҥ киһини сыһан-­соһон доҕордуулар Иисуска бу дьон быыһынан тиийэр кыахтара суоҕа. Эмискэ кинилэртэн биирдэрин сирэйэ сырдыы түспүтэ.

— Мин биллим! — диэбитэ кини. — Дьиэ үрдүнэн киллэриэххэ!

— Дьиэ үрдүнэн дуо? Ол аата хайдах?

— Бу дьиэ кырыысата туойтан оҥоһуллубут. Биһиги онно хайаҕас оҥоруохпут уонна киһибитин быанан аллара түһэриэхпит.

Этиллибит — оҥоһуллар. Биирдэстэрэ быа уонна туттар тэрил көрдүү тэбиммитэ. Хаалбыттар босхоҥ доҕордорун кирилиэһинэн дьиэ үрдүгэр таһаарбыттара. Наһаа өр түбүгүрбэтэхтэрэ: кырыысаҕа ыарыһаҕы батаран быанан түһэрэр хайаҕас баар буолбута. Бу хайаҕас Иисус турар сирин үрдүгэр этэ. Аллараттан хантайан эдэр дьон ыгылыйбыт сирэйдэрин көрүөххэ сөбө. Иисус мичээрдээбитинэн бастаан үөһэ, онтон босхоҥ киһини Кини иннигэр быанан түһэрбиттэрин көрбүтэ уонна ким да кэтэспэтэх тылларын эппитэ:

— Эн аньыыҥ-­хараҥ барыта бырастыы гыныллар.

Иисус аттыгар турбут сокуону үөрэтээччилэр уонна фарисейдар итини истэн кыйахаммыттара. Өссө диэ, аньыыны Таҥара эрэ бырастыы гынар! Бу Киһи Бэйэтин киммин дии санаммытый? Иисус билигин кинилэр тугу саныы туралларын билэн эппитэ:

— Эһиги санааҕытыгар хайатын этэр чэпчэкиний: эн аньыыларгын бырастыы гынабын, эбэтэр: тур уонна хаамп?

Сокуону үчүгэйдик билээччилэр аньыыны Таҥара эрэ бырастыы гынарын өйдүүллэрэ. Ол гынан баран Иисус босхоҥ киһи аньыыларын бырастыы гынан, кинилэр иннилэригэр турар киһи көннөрү майгыны-­сигилини үөрэтэр учуутал буолбатаҕын өйдөппүтэ.

«Ким кини аньыылара сотуллубутун-­сотуллубатаҕын билиэҕэй? — дии санаабыттара мустубут дьон. — Өскөтүн Эн ыарыһаҕы үтүөрдүбүтүҥ эбитэ буоллар, оччоҕо кырдьык ураты кыах Эйиэхэ баарын киһи утарсыа суоҕа этэ».

Кинилэр санааларын билэн Иисус эппитэ:

— Таҥара Миэхэ биэрбит күүһүнэн уонна былааһынан ыарыылары үтүөрдэр эрэ буолбакка, аньыылары эмиэ бырастыы гынарбын эһиги өйдүөхтээх этигит.

Ол кэннэ ыарыһахха эргиллэн эппитэ:

— Тур, тэллэххин ыл уонна дьиэҕэр бар!

Эр киһи сонно тута туран кэлбитэ, ыарыыта сүтэн хаалбыт этэ. Кини сөрүөтүн кыбыммыта уонна быаны ылан соһуйбут дьон быыһынан дьиэтин диэки бара турбута. Эр киһи Иисуска махтаммыта уонна Таҥараны айхаллыы-­айхаллыы барбыта. Үөһэ хайаҕас нөҥүө кэтии олорбут доҕотторун үөрбүт сирэйдэрэ сүтэн хаалбыттара.