Дьикти балыктааһын

Биирдэ Иисус Геннисарет күөлүн кытылыгар дьоҥҥо Таҥара тылын кэпсээбитэ. Олус элбэх киһи тоҕуоруспута, ол иһин Кини оҥочоҕо киирэн, кыратык кытылтан тэйэн баран үөрэҕин салҕаабыта. Ыраата түспүтүгэр Иисус барыларыгар үчүгэйдик көстөр уонна дьоҥҥо Кини этэрэ өйдөнүмтүө буолбута. Үөрэтэн бүтэн баран Иисус Петрга эппитэ:

— Күөл ортотугар киирэн илимҥин түһэр, оччоҕо элбэх балыгы тутуоҕуҥ.

— Билигин? Күөл ортотугар?

Бастатан туран, күнүс ким да балыктаабатын, иккиһинэн, ким да күөл ортотугар — түгэҕэр илим тиийбэт дириҥ сиргэ балыгы туттарбатын Петр өйдүүрэ. Ньылаар түгэхтээх кытыл аттыгар балыктыыр быдан ордук этэ.

— Үөрэтээччи, биһиги бөлүүн түүнү быһа сыраластыбыт да, туох да туппата, — диэбитэ тиһэҕэр Петр. — Кырдьыгынан эттэххэ, онно, күөл ортотугар, биһиги тугу да туппаппыт чахчы. Чэ, ол гынан баран Эн этэргинэн тиийэн илиммин түһэриэм.

Андрейдаах Петр оҥочоҕо ыстаммыттара, кытылтан тэйбиттэрэ. Иоанн Иаковтыын атын оҥочоҕо олорон, кэннилэриттэн батыспыттара. Кинилэр бу дьикти балыктааһын туох түмүктээх буоларын көрүөхтэрин баҕараллара. Ортотугар тиийэн баран, Петр Андрейдыын илимнэрин түһэрбиттэрэ уонна уу түгэҕин одуулуу олорбуттара. Эмискэ уу балык үрүҥ көмүс хатырыгынан кыймалас буола түспүтэ. Балыксыттар сымсатык илимнэрин кытыытыттан тардан барбыттара. Тардарга ыараханыттан сибикилээтэххэ, бултуйуу, арааһа, сүҥкэн быһыылааҕа. Иккиэн илимнэрин кыайбатахтара, ол иһин Иаковтаах Иоанны көмөҕө ыҥырбыттара.

Төрдүө эрэ буолан кинилэр нэһиилэ илимнэрин хостообуттара, балыктарын оҥочолоругар өрөһөлөөбүттэрэ. Илимнэрин сорох харахтара, Балык ыйааһынын тулуйбакка, бэл, быһыта барбыттара.

Киһи көрбүтүн итэҕэйбэт курдуга! Бачча элбэх балыгы кинилэр хаһан да туттара иликтэрэ! Балык маннык балысханнык кэлбитин көрөн, олус дьиксиммиттэрэ, оттон Симон Петр кутталыттан Иисус иннигэр тобуктуу түспүтэ:

— Тойонуом, миигиттэн тэй, тоҕо диэтэр мин аньыылаах киһибин. Мин Эн аттыгар буоларым сөбө суох!

Ол эрээри Иисус илиитин кини санныгар ууран баран эппитэ:

— Куттаныма, Петр. Инникитин эн балыгы буолбакка, дьону тутуоҥ!

Иисус үөрэнээччилэрэ оҥочолорун кытылга таһаарбыттара уонна өлгөм бултарын атыттар дьаһайалларыгар көрдөспүттэрэ, оттон бэйэлэрэ Иисуһу батыспыттара.