Холуодьас аттыгар көрсүһүү

Маннык хартыынаны харахпытыгар уруһуйдаан көрүөҕүҥ: күн сыралыппыт суолунан айанньыттар иһэллэр. Кинилэр Сихарь диэн кыра куорат таһыгар чугаһаан, хас да сүүс сыл анараа өттүгэр Иаков хаспыт холуодьаһын аттыгар тохтууллар. Бу Иисус уонна кини үөрэнээччилэрэ айаннаан иһэллэр. Эбиэт кэмэ чугаһаан, Үөрэтээччи үөрэнээччилэрин куоракка ас атыылаһыннара ыытар, оттон Бэйэтэ холуодьас аттыгар хаалар.

Күн ортото, күн үөһэттэн сыралыччы тыгар. Баччаларга холуодьас аттыгар ким да суох буолара, арай куораттан купсууннаах дьахтар тиийэн кэлбитэ.

Кини уу баһа турдаҕына, Иисус эмискэ киниэхэ эппитэ:

— Уугуттан иһэрт эрэ.

Иудей киһитэ киниттэн көрдүүрүттэн дьахтар олус соһуйбута, иудейдар самаряннары кытта кэпсэппэт этилэр эбээт. Иисус кини сүрэҕин билэр буолан, көмөлөһүөн баҕарбыта. Кини олус суолталааҕы — итэҕэл уонна Айыы Тойоҥҥо сөпкө сүгүрүйүү туһунан — дьахтарга эппитэ:

— Таҥара диэн Тыын буолар, онон Киниэхэ сүгүрүйээччилэр Тыын күүһүнэн уонна дьиҥ кырдьыгынан сүгүрүйүөхтээхтэр.

Иисус сүгүрүйэр сир оннук улахан суолталаах буолбатаҕын өйдөтөөрү итини эппитэ. Ханна баҕарар сылдьан Таҥараҕа үҥүөххэ сөп, тоҕо диэтэр Кини ханна баҕарар баар. Дьахтар олус болҕомтолоохтук истибитэ, Айыы Тыын киниэхэ Иисус тылларын өйдүүрүгэр көмөлөспүтэ. Дьахтар дьиҥ кырдьыгы көрдүүрэ, ол иһин ыйыппыта:

— Мессия кэлиэхтээҕин билэбин, ол эбэтэр Христос. Кини кэллэҕинэ биһиги Таҥара иннигэр кырдьыктаах буоларбыт туһугар тугу билиэхтээхпитин быһаарыаҕа.

Онуоха Иисус эппитэ:

— Ол — Мин, бу эйигин кытта кэпсэтэ Олорооччу буолабын!

Билигин дьахтар дьиҥ кырдьыгы билбитэ. Кини бу — Быыһааччы буоларын итэҕэйиэн эрэ наада этэ.

Самария дьахтара олус дьолломмута, ол иһин тугу истибитин куоракка тиийэн барыларыгар кэпсээри ыксаабыта. Кини өлбөт мэҥэ уутун биэрбит Быыһааччыны көрүстэ эбээт.

Христоспун дэнэр Киһини көрдөрөөрү Сихарь олохтоохторун дьахтар холуодьаска ыҥырбыта.

Олохтоохтор олус долгуйбуттара уонна Мессияны көрөөрү бары холуодьаска тиэтэйбиттэрэ.

Дьахтар олоҕор туох буолбутун барытын этэн биэрбит Киһини — Айыы Тойон Иисуһу Самария үгүс олохтоохторо итэҕэйбиттэрэ.

Кинилэр Иисустан өссө хаала түһэригэр көрдөспүттэрэ. Иисус куоракка икки күн буолбута, олохтоохтору кытта сэһэргэспитэ. Онон өссө элбэх киһи Кинини итэҕэйбитэ. Ыҥырбыт дьахтары кытта кинилэр үөрүүлэрин үллэстэллэрэ:

— Аны эн кэпсээҥҥинэн эрэ буолбакка, бэйэбит истэн, көрөн Кини дьиҥ кырдьык аан дойду Быыһааччыта буоларын итэҕэйдибит.

Ыйытыктар:

1) Иисус сынньанаары тохтообут холуодьаһа Израиль ханнык

сиригэр баарый?

2) Самария дьахтарыгар Иисус тугу эппитий?

3) Дьахтар тоҕо куоракка бара охсоору ыксаабытый? Кини олохтоохторго тугу кэпсээбитий?