Түүҥҥү ыалдьыт
Библия, Иоанн Евангелиятын 3 түһүмэҕин 1-21 хоһоонноро
Пасха бырааһынньыгын кэмигэр Иисус үгүс дьиктини көрдөрбүтэ, онон элбэх итэҕэйээччилэммитэ. Мессия, Быыһааччы быһыытынан сүрүннээн дьадаҥы дьон ылыммыта. Оттон баай өттө Кинини саарбаҕалыыра уонна Киниэхэ сэрэнэн сыһыаннаһара.
Ол гынан баран Иерусалимҥа чахчы Таҥараҕа наадыйар уонна Кинилиин соҕотохтуу көрсүһэн кэпсэтиэн баҕарар киһи баара.
Ол киһи күнүс кэпсэтиэн сэрэхэдийэрэ, тоҕо диэтэр кинини бары билэллэрэ, синедрион (үрдүк итэҕэллээхтэр сэбиэттэрин) убаастабыллаах чилиэнэ, фарисейдар итэҕэллээх түмсүүлэрин учуонайа этэ. Никодим диэн ааттааҕа.
Кини дьоҥҥо көстүмээри Иисуска түүн тиийбитэ. Дьиэҕэ киирэн Никодим эппитэ:
— Равви! Эн Таҥара ыыппыт Үөрэтээччитэ буоларгын билэбит. Тоҕо диэтэр, Эн оҥорор дьиктилэргин Таҥаралыын бииргэ буолбатах киһи оҥорор кыаҕа суох.
Никодим Иисуһу улуу Учууталынан ааҕара, ол эрээри Кини Таҥара Уола буоларын билбэт этэ. Соһуччу Иисус киниэхэ Таҥара Саарыстыбатыгар киирэр туһугар киһи үөһэттэн хаттаан төрүөх тустаах диэн эппитэ.
Никодим хаһан да үөйбэтэҕин истибитэ. Ол иһин кини Иисустан ыйыппыта:
— Хайдах киһи иккистээн төрүөн сөбүй? Ама кини төттөрү кыһыл оҕо буолар кыахтаах үһү дуо?
Иисус киһи үөһэттэн, Тыынтан төрүөхтээх диэбитэ. Итини Никодим өйдүүрэ олус ыарахан этэ. Ол иһин Айыы Тойон киниэхэ Иисус тугу этиэн баҕарбытын быһааран эппитэ:
— Хас биирдии киһи аньыылаах, ол аньыытыттан бэйэтэ ыраастанар кыаҕа суох. Кини Айыы Тыын эрэ нөҥүө уларыйыан, атын киһи буолуон сөп.
Ол хайдах буолара — киһиэхэ арыллыбат кистэлэҥ. Иисус бу тыллары Никодимҥа өйдөтөн эппитэ:
— Тыал хайа баҕарар диэки үрэр, кини тыаһын истэҕин эрээри, хантан хайа диэки барарын билбэккин. Тыынтан төрөөбүт киһиэхэ эмиэ ити курдук буолар.
Никодим өссө даҕаны Иисус тылларын өйдөөбөтөҕө:
— Хайдах оннук буолуон сөбүй? — диэн саҥа аллайбыта.
Таҥара Уолугар итэҕэл эрэ киһини кырдьыктаах оҥоруоҕа, Таҥара дьон аньыытын сотоору Бэйэтин Уолун толук биэриэҕэ диэн Иисус быһаарбыта:
— Таҥара Уолун аан дойдуну дьүүллэтэ ыыппатаҕа, аан дойду Кининэн быыһанарын туһугар ыыппыта.
Сотору кэминэн Никодим Айыы Тойону ылыммыта уонна Айыы Тыынтан үөһэттэн төрөөбүтэ. Ол кэннэ кини аны кыбыстыбат уонна Таҥара Уолун итэҕэйэрин норуоттан кистээбэт буолбута. Оттон өстөөхтөрө Иисуска өрө турдахтарына, кинини көмүскэһэрэ.
Ыйытыктар:
1) Тоҕо Никодим Иисуһу кытта биир бииргэ көрсүөн баҕарарый?
2) Киһи Таҥара Саарыстыбатыгар киирэригэр хайыахтааҕый?
3) Таҥара Бэйэтин Уолун сиргэ тоҕо ыыппытый?