Канаҕа буолбут дьикти

Иисус үөрэнээччилэрин кытта Галилея кыра сэлиэнньэтигэр Канаҕа кэлбиттэрин үһүс күнүгэр уруу малааһына буолбута. Иисус ийэтэ Мария онно эмиэ баара.

Бу олус көрдөөх уруу этэ: ыалдьыттар элбэҕи аһыыллара-­иһэллэрэ, ыллыыллара-­үҥкүүлүүллэрэ, көрдөөх кэпсээннэри кэпсииллэрэ уонна үөрэллэрэ-­көтөллөрө. Көр-нар оройугар долгуйбут Мария Иисуска соһуччу кэлэн сибигинэйбитэ:

— Уохтаах утах бүтэн хаалла!

Буолар да эбит! Дьон күтүөтү кэччэгэй дии саныахтара. Ыарахан балаһыанньаттан тахсар суолу булуо диэн Мария Иисуска эрэнэрэ. Ол эрээри Иисус ийэтэ тугу эрэйэрин билэр буолан ыйыппыта:

— Ийээ, Миигиттэн тугу эрэйэҕин? Мин кэмим өссө да кэлэ илик!

Мария Айыы Тойон тугу этэрин өйдөөбүтэ, кини Иисус барытын оҥорор кыахтааҕын билэрэ. Ол иһин чаҕардарга тиийэн оргууй сэрэппитэ:

— Мин Уолум эһиэхэ тугу этэрин барытын чопчу толорооруҥ.

Сотору буолан баран Иисус кырдьык чаҕардарга тиийбитэ. Кини онно алта улахан туой иһит кураанах турарын көрбүтэ.

— Иһиттэри уунан толоруҥ! — диэбитэ Кини чаҕардарга.

Иһиттэри уунан толороору үлэ бөҕөнү көрсүбүттэрэ.

— Билигин урууну салайааччы мантан баһан ылан амсайан көрдүн, — диэбитэ Иисус.

Чаҕардар Кини диэки соһуйбуттуу көрбүттэрэ. Тугу-тугу этэрий? Урууну салайааччы кинилэр холуодьастан таспыт ууларын иһэр дуо? Бу Назареттан сылдьар эдэр Киһи кинини күлүү-элэк оҥостуон баҕарар быһыылаах! Ол эрээри Мария эппит тылларын өйдөөн, сорудаҕы чопчу толорбуттара.

Уруу салайааччыта кэлэн куопсугунан иһиккэ баары амтаһыйан көрбүтэ.

— Һм, — диэн астыммыттыы ботугураабыта уонна күтүөккэ сулбу хааман тиийбитэ.

— Эн олус үчүгэй бырааһынньыгы тэрийдиҥ, — диэбитэ кини, — ол эрээри бииргэ сыыспыккын.

«Билигин кини миигин уохтаах утах тиийбэтэ диэн сэмэлиэҕэ», — дии санаан күтүөт кыбыстан умса көрбүтэ.

Ол эрээри салайааччы олох атыны эппитэ:

— Бастаан бастыҥ уохтаах утах иһэрдэр баҕайыта. Ол кэннэ, ыалдьыттар кыайан быһаарбат буоллахтарына, дьэ, чэпчэки уохтаах утах туруоруохтааххын. Оттон эн барытын төттөрү оҥорбуккун. Эн чаҕардарыҥ кута билигин турар арыгылара саамай бастыҥ!

Күтүөт маны истэн өмүттэн хаалбыта. Иисус ийэтэ Мария Уолун үөрбүт хараҕынан имэрийэ көрбүтэ, оттон Кини үөрэнээччилэрэ: «Дьиҥ кырдык Таҥара Бэйэтинэн Иисуһу дьоҥҥо көмөлөһүннэрээри ыыппыт эбит», — дии санаабыттара.