Иисус бастакы үөрэнээччилэрэ

Биирдэ, Иоанн Сүрэхтээччи Айыы Тойон туһунан норуокка туоһулаабытын кэннэ, Иисус эмиэ Иордаҥҥа кэлбитэ. Иоанн үөрэнээччилэрин Андрейы уонна Иоанны кытта кэпсэтэ турбута. Иоанн Сүрэхтээччи ааһан иһэр Иисуһу көрөөт, эппитэ:

— Көрүҥ, Таҥара Хойун Оҕото бу иһэр.

Андрей уонна Иоанн кинини кытта хаалбакка, Христоһу батыстахтарына саамай үчүгэй Үөрэтээччи булалларын өйдөтөөрү кини итини эппитэ. Андрейдаах Иоанн Айыы Тойону батыспыттара. Иисус кэннин хайыһан, батыһааччыларыттан ыйыппыта:

— Эһиги тугу көрдүүгүт?

— Үөрэтээччи! Эн ханна олороҕун? — диэн ыйыппыттара анараалар.

— Барсыҥ, оччоҕо көрүөххүт! — диэн хардарбыта Иисус.

Андрейдаах Иоанн Иисуһу батыһан, Кини олорор дьиэтигэр тиийбиттэрэ уонна киэһэриэр диэри онно олорбуттара. Иисустуун сэһэргэһэр үчүгэй да этэ! Ким даҕаны, хаһан даҕаны Айыы Тойон Иисус курдук дириҥник, ону тэҥэ истиҥник уонна судургутук кэпсэппэтэҕэ.

Андрей Симон диэн убайдааҕа. Кинилэр аҕаларын кытта Галилея байҕалын аттыгар Вифсаида куоракка олороллоро, бары балыксыт этилэр. Андрей Иисус туһунан кэпсээри убайын көрдүү барбыта.

— Биһиги Мессияны (ол аата Христоһу) буллубут! — Симоны көрсөөт, үөрүүтүн үллэстибитэ.

Ол кэнниттэн Андрей убайыгар Иисустуун билсэригэр эппитэ, киһитэ үөрүүнэн сөбүлэспитэ. Иисус Симоны көрөөт:

— Эн Иона уола Симоҥҥын, мантан ыла Кифа диэн ааттаныаҥ, ол аата Петр, «таас» диэн суолталаах, — диэбитэ.

Симон кини аатын Айыы Тойон эрдэттэн билэрин олус сөхпүтэ.

Иисус Симоҥҥа саҥа ааты биэрэригэр сотору кэминэн бу боростуой балыксыт таас курдук кытаанах, күүстээх итэҕэллээх буолуоҕун билэрэ.