Кумах куйаарга Иисуһу тургутуу

Таҥара уонна Кини Уолун саамай суостаах өстөөхтөрүнэн уруккуттан да адьарай буолара. Иисус Христос кинилиин дуолан утарсыыга турбута. Иордаҥҥа сылдьан Халлааннааҕы Аҕатын сорудаҕынан Бэйэтин сиргэ кэлбит соругун толорон барыаҕыттан ити саҕаламмыта. Айыы Тыын Иисуһу адьарайга тургуттараары кумах куйаарга илдьибитэ.

Иисус кураайы куйаарга түөрт уон күн уонна түөрт уон түүн устата тугу да аһаабатаҕа, уу да испэтэҕэ.

Киһини барытын хаһан баҕарар аньыыга угуйа сатыыр адьарай Киниэхэ кэлбитэ. Кини Иисуһу аччыктаан мөлтүү сылдьар кэмигэр албыҥҥа үктэтиэм дии саныыра. Өскөтүн Быыһааччы аньыыны оҥордоҕуна, Кини аны хаһан даҕаны атын дьон аньыытын Бэйэтигэр ылар кыаҕа суох буолар. Оннук буолар түбэлтэтигэр киһи аймах үйэлэр тухары быыһаныыга тиксибэт. Оччотугар адьарай сыалын ситиһэр кыахтаах этэ.

— Өскөтүн Эн Таҥара Уола буоллаххына, тааһы килиэп буол диэн соруй! — диэбитэ адьарай.

Иисус киниэхэ хардарбыта:

— Киһи аҥаардас килиэбинэн эрэ буолбакка, Таҥара этэр хас биирдии тылынан олоруоҕа.

Адьарай Иисуска тугу да кыайан утары этэр кыаҕа суоҕа. Онон атын тургутууну толкуйдаабыта. Адьарай Иисуһу үрдүк хайаҕа таһаарбыта уонна сир бары саарыстыбаларын, үүнэн-­үрдээн туралларын көрдөрөн баран бэрдимсийэн эппитэ.

— Өскөтүн миэхэ сүгүрүйэр буоллаххына, маны барытын Эйиэхэ биэриэҕим.

— Киэр буол Миигиттэн, адьарай. «Айыы Тойон Таҥараҕар сүгүрүй уонна Киниэхэ эрэ сулууспалаа» диэн суруллан турар.

Ол кэннэ адьарай Иисуһу Иерусалимҥа илдьэн, Таҥара дьиэтин чыпчаалыгар туруоран баран эппитэ:

— Өскөтүн Эн Таҥара Уола буоллаххына, аллара ыстан, «Аанньалларыгар Эйигин араҥаччылыырга соруйуоҕа, оччоҕо таастан бүдүрүйбэтиҥ туһугар, кинилэр Эйигин көтөҕөн илдьиэхтэрэ» диэн суруллан турар.

Иисус Библияны олох тиэрэ быһаарар тургутааччыны кытта мөккүһэ барбатаҕа, Ытык Суруйуулар тылларынан хардарбыта: «Айыы Тойон Таҥараҕын тургутан көрүмэ».

Ити курдук адьарай Иисустан тугу да сатаан ситиспэккэтэйбитэ.

Ыйытыктар:

1) Адьарай тоҕо Иисус соругун үрэйэ сатаабытый?

2) Иисуһу Ким кумах куйаарга илдьибитий?

3) Адьарай Иисуһу хайдах үстэ тургуппутуй? Онуоха Иисус туох диэн

хардарбытый?