Иисус төрөппүттэриниин

Иисус Назарекка мас ууһун Иосиф дьиэтигэр улааппыта. Уон икки сааһын туолбутугар Иосиф уонна Мария Кинини Иерусалимҥа Паасха бырааһынньыгар илдьэ барбыттара.

Иудейдар Паасханы сыл аайы бэлиэтииллэрэ, бу бырааһынньыгы олус кэтэһэллэрэ. Сорохторо Иерусалимҥа хас да күн айаннаан тиийэллэрэ уонна араас дойдулартан кэлбит иудейдары кытта храм бары тэрээһиннэригэр кытталлара. Норуот онно кинилэри таптыыр уонна куруутун көмөлөһөр Таҥараны айхаллыыра. Бары сүргэлэрэ көтөҕүллэрэ, ордук уон икки саастарын былырыын туолбут оҕолор үөрэллэрэ-­көтөллөрө. Тоҕо диэтэр, кинилэр бу өрөгөйгө бастакыларын кытталлара.

Бу сырыыга төрөппүттэрэ Иисуһу ылан, ыаллыы олорор дьоннорун кытта бииргэ Иерусалимҥа айаннаабыттара. Уол бу айан кэмигэр тугу көрбөтөҕөй уонна истибэтэҕэй! Аҥаардас Иерусалимҥа тиийиэр диэри үгүһү кэрэхсээбитэ, ол эрээри куорат көстүүтэ уһулуччу этэ: үтүөкэннээх храм уонна тыһыынчанан куолас биир буолан иһиллиитэ… Иисус туох ханнык иннинэ храмҥа сулууспа хайдах ааһарын кэрэхсиирэ. Төрөппүттэрэ Уолларыгар буола турар сиэри-­майгыны барытын быһаараллара, суолтатын өйдөтөллөрө.

Паасха бырааһынньыга сэттэ күн устата буолбута. Бырааһынньык кэнниттэн айанньыттар төннөргө тэриммиттэрэ. Мариялаах Иосиф Уолларын көрдөөбүттэрэ да булбатахтара. Ыалларын кытта айаннаабыта буолуо дии санаабыттара, тоҕо диэтэр, кинилэри кытта бииргэ сылдьарын сөбүлүүрэ. Онон улаханнык аймаммакка айаҥҥа туруммуттара. Киэһэлик кинилэр Назареттан сылдьар итэҕэллээхтэри сиппиттэрэ. Төрөппүттэрэ Иисуһу кинилэр ортолоругар булбатахтара. Төһөлөөх куттаммыттара буолуой!? Тугу гыныахха, хайдах буолуохха?

Иерусалимҥа төннөллөрүгэр тиийбиттэрэ! Онно-манна бары көрдөөбүттэрэ, уон икки саастаах уолу көрбөтөххүт дуо диэн көрсүбүт дьонтон барыларыттан ыйыталаспыттара. Элбэх дьон сөп түбэһэр саастаах уолаттары көрбүт этилэр даҕаны, кинилэр көрдүүр Уоллара буоларын ким билиэҕэй?! Иисус билигин ханна баар буолуон сөбүн ким да этэр кыаҕа суоҕа. Ханна көрдүөххэ?

Иосифтаах Мария куттаналлара, долгуйаллара улаатан испитэ. Кинилэр өссө биирдэ храмҥа сокуонньуттар Ытык Суруйуу туһунан сэһэргэһэр хосторун көрөргө быһаарыммыттара. Иисуһу онно буларга эрэллэрэ суоҕун кэриэтэ этэ. Үөрэхтээх улахан дьон ортотугар Оҕо тугу гыныай?! Кинилэр кэпсэтиилэриттэн Кини тугу да син биир өйдөөбөт буоллаҕа, онон тэһийбэтэ чахчы.

Ол эрээри кинилэр Уолларын храмтан булбуттара. Мариялаах Иосиф көрбүттэрин, истибиттэрин итэҕэйбэккэ турбуттара. Иисус сокуонньуттартан элбэҕи, арааһы ыйыталаһара, анараалара нэһиилэ эппиэттииллэрэ. Оттон кинилэр ыйыттахтарына, Иисус олус мындырдык хардарара. Учууталлар хас биирдии итинник хоруй кэннэ сөҕөн, бастарын быһа илгистэллэрэ, бу мындыр Уолтан соһуйаллара.

Мария уонна Иосиф үөрүүлэриттэн Уолларын кууһан ылбыттара. Ол кэннэ Мария сэмэлээбиттии ыйыппыта:

— Ханна сырыттыҥ? Биһиги Эйигин олус өр көрдөөтүбүт!

— Мин наар манна этим. Халлааннааҕы Аҕабар ананар дьиэҕэ баар буолуохпун, ама, сэрэйбэтэххит дуо? — диэн хардарбыта Иисус.

Иосиф да, Мария да Кини эппит тылларын өйдөөбөтөхтөрө, Уолларын илдьэ Назарекка төннүбүттэрэ.

Иисус сыллар аастахтарын аайы өссө мындыр буолан испитэ. Кини ийэлээх аҕатын таптыыра, өссө 18 сыл төрөппүттэрин кытта, кинилэр этэллэринэн сылдьыбыта. Храмтан булалларыгар Иисус эппит тылларын ийэтэ Мария олоҕун тухары өйдүү сылдьыбыта, бу тыллар суолталарын үгүстүк толкуйдуура.

Ыйытыктар:

1) Ханнык бырааһынньыкка иудейдар Иерусалимҥа барыахтаах этилэрий?

2) Бу бырааһынньыкка уолаттары хас саастарыттан храмҥа сырытыннаралларый?

3) Иосифтаах Мария Иисуһу булалларыгар Кини ханна уонна тугу гына сылдьыбытый?

4) Храмҥа бастаан сылдьыаҕыттан Иисус Назарекка өссө хас сыл төрөппүттэрин кытта бииргэ олорбутуй?