Даниил Дарий ыраахтааҕы дыбарыаһыгар

Саҥа саарыстыбаны, мидяннар уонна перстэр саарыстыбаларын, Кир ыраахтааҕы баһылыыра, кини Вавилон ыраахтааҕытынан мидянин Дарийы анаабыта. Дарий дойдуну салайарга сүүс сүүрбэ сатрапы туруорбута. Оттон кинилэр үрдүлэринэн бэрээдэги көрөр үс кинээс баара. Ол кинээстэртэн биирдэстэрэ Даниил этэ. Дарий ыраахтааҕы Даниилы олус сыаналыыра, ол эрээри дыбарыас иһигэр кини ситиһиилэрин ордугургуур дьон баара. Кинилэр Даниилы суох гынаары, көлдьүн былааны толкуйдаабыттара. Биирдэ кинилэр ыраахтааҕыга кэлэн эппиттэрэ:

– Оо, ыраахтааҕыбыт, эн күннэриҥ уһаатыннар дуу! Эн модун күүстээх, үтүө уонна амарах санаалаах ыраахтааҕы буолаҕын. Дьон бары эн үтүөнү оҥорор буолаҥҥын олороллор. Ол эрээри сорохтор ону билбэттэр. Биһиги эн үтүө быһыыгын бары билэллэрин туһугар манныгы толкуйдаатыбыт: биир ый устата дойду үрдүнэн биир да киһи эйигиттэн ураты атын кимтэн да амарах сыһыаны көрдөһүө суохтаах диэн уураах таһаарыаххын наада. Киһиттэн да, Таҥараттан да көрдөспөккө, эйигиттэн эрэ тугу эмэ көрдөстүннэр. Оччоҕуна эн хайдахтаах курдук үтүө ыраахтааҕы буоларгын бары дьэҥкэтик өйдүөхтэрэ.

– Сөпкө толкуйдаабыккыт, — диэбитэ хайҕаттаран манньыйбыт ыраахтааҕы. — Мин ити уураахха илии баттыам. Оттон ким итини кэспит — хахайдардаах хаспахха быраҕыллыа.

Ыйытыктар:

1) Вавилон саҥа ыраахтааҕытын аата кимий?

2) Даниилы киминэн анаабыттарый?

3) Туох уурааҕар Дарий илии баттаабытый?