Кытара кыыспыт оһох

Даниил Таҥарата соҕотох дьиҥнээх Таҥара буоларын Навуходоносор ыраахтааҕы түргэнник умнубута. Кини кыһыл көмүстэн эмэгэт оҥорторбута, онно бары сүгүрүйүөхтээх этилэр. Биирдэ бырааһынньык тэрийбиттэрэ, элбэх ыалдьыт ыҥырыллыбыта, олор быыстарыгар Даниил доҕотторо эмиэ. Музыка тыаһаатаҕына бары умса түһэн эмэгэккэ сүгүрүйүөхтээхтэрин туһунан биллэрбиттэрэ, ким ону толорботох умайа турар оһоххо быраҕыллыа диэн сэрэппиттэрэ.

Бырааһынньык саҕаламмыта, музыка оонньообутугар бары умса түһэн кыһыл көмүс эмэгэккэ сүгүрүйэн барбыттара. Арай үс Иудей уолаттара эрэ сүгүрүйбэтэхтэрэ. Үлэһиттэр ону көрөн ыраахтааҕыларыгар тыллаабыттара. Навуходоносор кыыһыран тымтыбыта уонна уолаттары аҕалалларыгар соруйбута.

– Эһиги кыһыл көмүс эмэгэккэ сүгүрүйэҕит, эбэтэр кытарыар диэри оттуллубут оһоххо быраҕыллаҕыт! Оччоҕуна ханнык таҥара эһигини миигиттэн өрүһүйүөй? — диэн ыраахтааҕы модьуйбута.

Онуоха Седрах, Мисах уонна Авденаго ыраахтааҕыга эппиттэрэ:

– Биһиги Таҥарабыт кытара кыыспыт оһохтон да, эн илиигиттэн да өрүһүйэр кыахтаах. Өскөтүн Кини оннук оҥорботоҕуна даҕаны, син биир эн таҥараларгар сулууспалыахпыт суоҕа, көмүс эмэгэккэ сүгүрүйбэппит!

Ону истэн баран Навуходоносор оһоҕу уруккуттан сэттэ төгүл күүскэ отуннарбыта. Бу үс эдэр уолу баайан баран оһоххо быраҕалларыгар саамай күүстээх сэрииһиттэригэр соруйбута. Оһох суоһа олус күүстээх буолан, Седраҕы, Мисаҕы уонна Авденагону уокка бырахпыт сэрииһиттэрэ умайан өлөн хаалбыттара. Оттон үс эдэр уол оһох иһигэр баайыллыбытынан түспүттэрэ.

Ыраахтааҕы маны барытын көрө олорбута, сөҕүөн уонна уолуйа дьулайыан иһин, оһох иһигэр туох эрэ киһи сатаан быһаарбат дьикти көстүүтэ буолбута. Кини ойон турбута уонна сүбэһиттэриттэн ыйыппыта:

– Биһиги үс баайыллыбыт уолу бырахпыппыт буолбат дуо?

– Оннук, — диэбиттэрэ кинилэр.

– Оттон мин көрдөхпүнэ, уот иһигэр түөрт киһи туох да буолбатаҕын курдук хаама сылдьаллар дии! Төрдүстэрэ Таҥара уолун курдук көрүҥнээх, — диэн барбах эппитэ Навуходоносор.

Кини оһоххо сүүрэн тиийэн хаһыытаабыта:

– Седрах, Мисах уонна Авденаго, Үрдүк Таҥара кулуттара! Тахсыҥ! Кэлиҥ манна!

Онуоха уолаттар үһүөн уоттан тахсан ыраахтааҕыга чугаһаабыттара. Уот кинилэр биир да салаа баттахтарын, таҥастарын сиэбэтэх этэ, бэл, буруо да сыта кинилэртэн кэлбэтэ. Бу улуу дьикти этэ, тоҕо диэтэххэ, оннооҕор, оһох айаҕар чугаһаабыт күүстээх сэрииһиттэр умайбыттара.

Навуходоносор Иудей уолаттарын Таҥараларын модун күүһүн билинэригэр эрэ тиийбитэ. Кини көнөтүнэн эппитэ:

– Таҥараларыгар бэриниилээх, Киниэхэ эрэнэр Седраҕы, Мисаҕы уонна Авденагону быыһатаары Бэйэтин Аанньалын ыыппыт Таҥара алгыстаах! Бу уолаттар бэйэлэрин Таҥараларыттан ураты атын таҥараҕа сулууспалаабат уонна сүгүрүйбэт туһуттан олохторун биэрэргэ да бэлэм этилэр!

Навуходоносор үс доҕордууларга дуоһунастарын төнүннэрбитэ уонна кинилэргэ улахан ытыктабылын биллэрбитэ.

Ыйытыктар:

1) Навуходоносор ханнык дьаһал таһаарбытый?

2) Тоҕо Даниил доҕотторо кыһыл көмүс эмэгэккэ

сүгүрүйэргэ сөбүлэспэтэхтэрий?

3) Таҥара уолаттары хайдах быыһаабытый? Навуходоносор

ону көрөн туох диэбитий?