Даниил уонна кини доҕотторо

Навуходоносор дыбарыаһыгар Иудея ыраахтааҕытын уонна кинээстэрин удьуордарын хас да уолаттара олорбуттара. Ыраахтааҕы ити уолаттарга ураты былааннааҕа. Кини үс сыл устата ити уолаттары халдей тылыгар уонна араас наукаларга үөрэттэрэн, кэнники сүүнэ улахан империятын салайарга көмөлөһөөччү оҥостуон баҕарара. Уолаттар Даниил, Анания, Мисаил уонна Азария диэн ааттаахтара. Ол эрээри туох даҕаны Иудеяттан төрүттээхтэрин санаппатын курдук, кинилэргэ Вавилон ааттарын биэрбиттэрэ: Валтасар, Седрах, Мисах уонна Авденаго.

Доҕордуулар билиэҥҥэ сытан, бэйэлэрин Таҥараларыгар итэҕэйэллэрин уонна үҥэллэрин тохтоппотохторо. Өлөр да куттал баарын үрдүнэн, кинилэр эрдэттэн ыраахтааҕы остуолун аһын аһаан уонна утаҕын иһэн бэйэлэрин киртиппэт гына быһаарыммыттара.

Таҥара эдэр уолаттары эр санааларын уонна эрэллээхтэрин иһин алҕаабыта уонна кинилэргэ мындыр өйү, билиини уонна үөрэҕи ылынымтыа буолары, ону таһынан кэрэ тас көстүүнү бэлэхтээбитэ.

Даниил Таҥараттан туспа дьоҕуру ылбыта — Айыы Тыын көмөтүнэн кини түүллэри уонна араас көстүүлэри быһаарара.

Биирдэ кини ким да кыайан тобулбатах Навуходоносор түүлүн быһааран биэрбитэ. Ыраахтааҕы улаханнык сөхпүтэ, оттон Даниил ити кини өҥөтө буолбакка, Таҥараттан бэриллибит дьоҕура буоларын эппитэ. Онтон ыла Даниил сүгүрүйэр истиҥ Таҥаратын Навуходоносор албан аатырдар буолбута.