Билиэҥҥэ түбэһии

Соломон ыраахтааҕы улуу уонна баай дойдуну салайыаҕыттан үс сүүс сыл ааспыта.

Кини өлбүтүн кэннэ саарыстыба икки аҥы хайдыбыта. Киин куоратынан, уруккутун курдук, Иерусалим хаалбыта. Онно ыраахтааҕы дыбарыаһа турара уонна, саамай сүрүнэ, Соломон туттарбыт Таҥара дьиэтэ баара. Билигин ити сир Иудея диэн ааттанара.

Хомойуох иһин, ыраахтааҕы даҕаны, норуот даҕаны Таҥара суолуттан тэйбиттэрэ, Кини кэриэстэрин толорбот, атын таҥараларга уонна эмэгэттэргэ сүгүрүйэр буолбуттара. Таҥара пророктара норуоту өйдөтө сатыыллара уонна кэмсинэргэ ыҥыраллара, ол гынан баран кинилэри ким да истибэт этэ.

Онтон Таҥара иэстэбилэ кэлэн, дойдуну Вавилон олохтоохторо баһылаабыттара.

Навуходоносор, Вавилон ыраахтааҕыта, иудейдар саамай кутталлаах өстөөхтөрө этэ. Кини халыҥ аармыйалаах кэлэн, Иерусалимы сэриилээбитэ, ыраахтааҕыны билиэҥҥэ ылбыта, Таҥара дьиэтиттэн кыһыл уонна үрүҥ көмүс иһиттэрин хомуйан, Вавилоҥҥа туора омук таҥаратын дьиэтигэр аҕалтарбыта. Вавилон олохтоохторо Таҥара дьиэтиттэн уонна Соломон дыбарыаһыттан баайдарын-­дуолларын барытын халаабыттара. Былдьаан-­талаан баран ыраахтааҕы дыбарыаһын, Таҥара дьиэтин уонна баай иудейдар дьиэлэрин барытын уоттаабыттара.

Навуходоносор ыраахтааҕы уолаттарын, иудей кинээстэрин, сэттэ тыһыынча чулуу сэрииһити, ону таһынан мас уонна тимир уустарын барыларын билиэн ылан Вавилоҥҥа илдьибитэ.

Иудеяны уонна Иерусалимы Навуходоносор бэйэтин былааһыгар ылбыта.

Айыы Тойон ити курдук истигэнэ суох уонна аньыылаах Бэйэтин норуотугар дьүүлүн ыыппыта. Билиэҥҥэ олорор кэмнэригэр Израиль норуота Айыы Тойон — бу истиҥ Таҥара, оттон эмэгэттэр — сымыйа таҥаралар буолалларын өйдүөх тустаахтара.

Ыйытыктар:

1) Айыы Тойон норуота Киниэхэ эрэллээҕэ дуо?

2) Иудейдар сүрүн өстөөхтөрө ким буолбутуй?

3) Вавилон олохтоохторо Иерусалимы

хайаабыттарый?