Ниневия олохтоохторо кэмсинэллэр

Хас да нэдиэлэ буолан баран Иона улахан куорат уулуссаларын кэрийэн, Таҥара киниэхэ тугу эппитин дьоҥҥо тиэрдэ сылдьара:

– Түөрт уон хонугунан Ниневия куорат урусхалланыаҕа.

Дьиктитэ баар, ким да кинини күлүү-элэк гыммат этэ. Ким даҕаны киниэхэ саба түспэтэҕэ, суоһаабатаҕа. Төттөрүтүн – дьон Ионаны итэҕэйэрэ. Бу уураах сөптөөх этэ: кинилэр элбэх норуоту кытта сэриилэһэллэрэ уонна үгүс иэдээни оҥороллоро. Оҥорбут аньыылара иэстэбиллээх буолуоҕун дьэҥкэтик өйдүүллэрэ.

Пророк уонна кини сэрэтиитин туһунан ыраахтааҕы эмиэ истибитэ.

– Дьон-сэргэ бары Таҥараттан үҥэн көрдөстүннэр, – диэн соруйбута ыраахтааҕы. – Баҕар, Кини өссө биһигини бырастыы гыныаҕа. Бары астан туттуннуннар, оттон кэмсинэллэрин бэлиэтин мааны таҥастарын оннугар куул таҥаһы кэттиннэр.

Түөрт уон күн ааспытын кэннэ Иона, Ниневия урусхалланарын көрөөрү, куорат аттыгар баар томтордортон биирдэстэригэр тахсан, кэтэспитэ. Ол гынан баран куорат урусхалламматаҕа. Күн киирэрэ чугаһаабыта даҕаны, Ниневия туох да буолбатаҕын курдук турбута. Иона онтон сылтаан кыйахаммыта. Тоҕо оччоҕуна Таҥара дьүүлэ чугаһаабытын туһунан кини дьон дьоҥҥо барытыгар кэпсээбитэй? Ниневия кырыктаах олохтоохторо өлбүттэрэ эбитэ буоллар, сөптөөх буолуо этэ.

Иона тохтообут томторугар олус куйаас этэ, онтон кини эбии кыйаханара. Сарсыҥҥы күнүгэр уһуктан баран, аттыгар улахан үүнээйи турарын көрбүтэ. Бу үүнээйи сэбирдэхтэрин күлүгэр олорон Иона абыраммыта.

Ити үүнээйини Таҥара итиччэ түргэнник үүннэрэн таһаарбыт этэ. Ол гынан баран Кини сарсыҥҥы күнүгэр үүнээйини хатаран кэбиспитэ.

Иона онтон сылтаан олус хоргуппута уонна өлөргө да бэлэм этэ.

Онуоха Таҥара киниэхэ эппитэ:

– Көрөҕүн, эн бэйэҥ кыһаллан туран үүннэрбэтэх үүнээйигин харыһыйаҕын. Оттон Мин хайдах элбэх дьон олорор Ниневия куоратын аһыныам суоҕай?

Онно Иона Айыы Тойон хайдахтаах курдук тулуурдааҕын, амараҕын уонна түргэнник бырастыы гынарын өйдөөбүтэ.