Сааба сарыыссата

Соломон албан аата уонна кини үтүөкэннээх тутууларын туһунан сурах сир бары муннуктарыгар тиийэ тарҕаммыта. Дьон Иерусалимҥа үтүөкэннээх Таҥара дьиэтин көрө уонна Соломон муударай тылын-өһүн истэ диэн кэлэллэрэ. Кинилэр быыстарыгар Сааба сарыыссата эмиэ баара.

Кини бэйэтэ олус баай дьахтар этэ. Ол сарыысса Соломоҥҥа аҕалбыт бэлэхтэриттэн да көстөрө. Сыаналаах үчүгэй сыттаах арыылары, кыһыл көмүһү уонна күндү таастары тэбиэннэригэр тиэйэн аҕалбыта. Бу баайы айаҥҥа элбэх кулут харабыллыыра.

Соломон мааны ыалдьыты ыраахтааҕы сиэринэн көрсүбүтэ. Сааба сарыыссата Соломонтан элбэҕи ыйыталаспыта уонна ис сүрэҕиттэн кинилиин ону-маны барытын сэһэргэспитэ. Соломон кини ыйытыыларыгар барытыгар эппиэттээн иһэрэ, ыраахтааҕы кыайан быһаарсыбат хайысхата суох этэ.

Сааба сарыыссата Соломон кырдьык да муударайын өйдөөбүтэ, кини туппут дьиэтин, аһыыр аһын, кулуттара олорор дьиэлэрин, кэтэр таҥастарын уонна Айыы Тойон дьиэтигэр уокка биэрэр сиэртибэлэрин көрөн, сөхпүтүн-­махтайбытын кистээбэтэҕэ.

Сарыысса долгуйан туран эппитэ:

– Эн мындыргын уонна баайгын-­дуолгун истибитим кырдьык эбит эрээри, миэхэ аҥарын даҕаны ситэ кэпсээбэтэх эбиттэр! Эн өйүҥ-санааҥ уонна быһыыҥ-­майгыҥ мин бары истибиппин барытын быдан куоһарар эбиттэр.

Эйигин талбыт уонна ыраахтааҕынан туруорбут Айыы Тойоҥҥо айхал буолуохтун! Кини Израильга үйэлээх тапталыгар сиэттэрэн эйигин талбыт эбит!